विश्व फुटबलका दुई महान् फरवार्डहरू किलियन एम्बाप्पे र एर्लिङ हालान्ड शुक्रबार बोस्टन स्टेडियममा आमनेसामने हुँदैछन्। फ्रान्स र नर्वे दुवैले आ–आफ्ना स्टार स्ट्राइकरहरूको उत्कृष्ट प्रदर्शनको मद्दतमा विश्वकपका सुरुवाती दुई खेल जितिसकेका छन्। एम्बाप्पे र हालान्ड दुवैले सुरुवाती दुई खेलमा दुई–दुई गोल गर्दै प्रतियोगितामा कुल चार गोल गरिसकेका छन्। ५ गोल गरेका लियोनेल मेस्सी हाल गोल्डेन बुटको दौडमा सबैभन्दा अगाडि छन्।
समूह ‘आई’ को शीर्ष स्थान अझै निश्चित नभएकाले दुवै टोली नकआउट चरणमा पुगिसके पनि यी दुवै खेलाडीले सुरुवाती एघारमै खेलेर मैदान उत्रिने अपेक्षा गरिएको छ। यो खेलले समूहमा पहिलो स्थान कसले हासिल गर्छ र आगामी चरणमा तुलनात्मक रूपमा सहज बाटो पाउँछ भन्ने कुराको निर्धारण गर्नेछ।
टोलीका लागि कति महत्त्वपूर्ण?
क्लब फुटबलमा जस्तै अन्तर्राष्ट्रिय मञ्चमा पनि एम्बाप्पे र हालान्डको महत्त्व अझ बढी देखिन्छ। सन् २०२२ अगस्टदेखि फ्रान्सले एम्बाप्पे टोलीमा हुँदा ६९.८ प्रतिशत खेल जितेको छ भने उनी नहुँदा यो जितको दर ५० प्रतिशतमा झर्छ। फ्रान्सका लागि सर्वकालीन धेरै गोल गर्ने एम्बाप्पेको उपस्थितिले टोलीको आक्रमणलाई थप उत्पादनशील बनाउँछ। उनी टोलीमा हुँदा फ्रान्सले प्रतिखेल औसत २.३ गोल गरेको छ भने उनी नहुँदा १.९ गोल मात्र गरेको छ।
नर्वेको सीमित खेलाडीका कारण हालान्ड आफ्नो देशका लागि झनै महत्त्वपूर्ण सावित भएका छन्। सन् २०२२ अगस्टदेखि नर्वेले हालान्ड टोलीमा हुँदा ६४.५ प्रतिशत खेल जितेको छ भने उनी विना केवल ३३.३ प्रतिशत खेल मात्र जित्न सकेको छ।
दबाब र कीर्तिमानको होड
मेस्सीमाथि सबैको ध्यान केन्द्रित भए पनि एम्बाप्पेले विश्वकपको गोल तालिकामा उनलाई भेट्टाउन धेरै समय लाग्ने देखिँदैन। ३९ वर्षका मेस्सीभन्दा फ्रान्सेली स्ट्राइकर एम्बाप्पे मात्र दुई गोलले पछि छन्। उनले १६ विश्वकप खेलमा १६ गोल गरिसकेका छन्। एम्बाप्पे मेस्सीभन्दा १२ वर्ष कान्छा छन् र अर्जेन्टिनी लेजेन्ड मेस्सीको यो अन्तिम विश्वकप हुन सक्ने हुनाले एम्बाप्पेसँग अघि बढ्ने ठूलो अवसर छ।
आफ्नो पहिलो विश्वकप खेलिरहेका हालान्डले पनि उत्कृष्ट सुरुवात गरेका छन्। विश्वकप इतिहासमा आफ्नो सुरुवाती दुई खेलमै दुई वा सोभन्दा बढी गोल गर्ने उनी छैटौँ खेलाडी बनेका छन्। विगत ५० वर्षमा यो उपलब्धि हासिल गर्ने उनी ह्यारी केन (२०१८) पछि दोस्रो खेलाडी हुन्। उनले नर्वेका लागि लगातार १२ प्रतिस्पर्धी अन्तर्राष्ट्रिय खेलमा गोल गरेका छन्, जसमा पछिल्ला ६ खेलमा मात्रै १६ गोल सामेल छ।
अन्तर्राष्ट्रिय मञ्चमा हालान्ड समग्रमा बढी उत्पादक देखिएका छन्। एम्बाप्पेले १०० खेलमा ६० अन्तर्राष्ट्रिय गोल गरेका छन् भने हालान्डले ४८ खेल कम अर्थात् मात्र ५२ खेल खेल्दै ५९ गोल गरिसकेका छन्।
खेल शैली र तथ्याङ्कको तुलना
यस विश्वकपको ‘हिट म्याप’ ले यी दुई खेलाडी मैदानको कुन क्षेत्रमा बढी सक्रिय रहन्छन् भन्ने कुरा देखाउँछ। यस सिजन क्लब फुटबलको तथ्याङ्क हेर्दा एम्बाप्पेले प्रहार (शट्स), बल बढाउने (टचेस) र अवसर सिर्जना गर्ने मामिलामा हालान्डलाई पछि पारेका छन्, यद्यपि म्यानचेस्टर सिटीका स्ट्राइकर हालान्डले सन् २०२५–२६ मा बढी असिस्ट प्रदान गरेका थिए।
यी दुईबीच ड्रिब्लिङमा पनि ठूलो भिन्नता छ। यस विश्वकपका सुरुवाती दुई खेलमा एम्बाप्पेले १४ पटक ड्रिबलको प्रयास गरेका छन् भने हालान्डले मात्र एक पटक यस्तो प्रयास गरे। जहाँ हालान्ड अगाडि छन्, त्यो हो अवसरलाई गोलमा बदल्ने क्षमता (चान्स कन्भर्सन)। विगत चार सिजनका लिग खेलहरूमा हालान्डले २३.४३ प्रतिशत प्रहारलाई गोलमा बदलेका छन् भने एम्बाप्पेको यो दर १८.२४ प्रतिशत मात्र छ। रक्षात्मक योगदानको मामिलामा भने एम्बाप्पे निकै कमजोर देखिन्छन्। यस सिजन रियल मड्रिडका लागि कम्तीमा ९०० मिनेट खेलेका युरोपका शीर्ष पाँच लिगका १ हजार ४ सय ८३ खेलाडीहरूमध्ये रक्षात्मक योगदानमा उनी १ हजार ४ सय ८१ औँ स्थानमा परेका थिए।
नर्वेलाई कहाँसम्म पुर्याउलान् हालान्डले?
दुवै खेलाडीको आफ्नो टोलीको गोलमा रहेको सहभागिता उस्तै प्रकारको छ। सन् २०२२ अगस्टदेखि एम्बाप्पेले फ्रान्सका कुल गोलमध्ये ४४ प्रतिशतमा योगदान (३३ गोल र १७ असिस्ट) दिएका छन्। सोही अवधिमा हालान्डले नर्वेका ४३.९ प्रतिशत गोलमा योगदान (३९ गोल र ४ असिस्ट) पुर्याएका छन्।
फ्रान्स यस पटक विश्वकप जित्ने मुख्य दाबेदारमध्ये एक हो र स्वयं हालान्डले पनि शुक्रबार फ्रान्सले नर्वेलाई हराउने र उपाधि जित्ने विश्वास व्यक्त गरेका छन्। यद्यपि, पेनाल्टी बक्सभित्र निकै खतरनाक मानिने हालान्डको लयका कारण नर्वेले फ्रान्सलाई कडा टक्कर दिन सक्ने क्षमता राख्छ। हालान्ड टोलीमा भएसम्म नर्वेको महत्त्वाकांक्षालाई कम आँक्न मिल्दैन।बीबीसी
प्रतिक्रिया