बिहीबार बसेको मन्त्रिपरिषद् बैठकले नेपाल प्रहरीका ८ जना प्रहरी अतिरिक्त महानिरीक्षक (एआईजी) हरूको सरुवा गर्ने निर्णय गरेको छ। सिंहदरबारमा बसेको बैठकले प्रहरी प्रशासनमा व्यापक हेरफेर गर्दै एकैपटक ८ एआईजीको सरुवा गरेको हो।
सरकारका प्रवक्ता एवं शिक्षा, विज्ञान तथा प्रविधिमन्त्री सस्मित पोखरेलले बैठकका निर्णयहरू सार्वजनिक गर्दै यो जानकारी दिए। यो बैठकले प्रहरी सरुवासँगै अन्य विभिन्न महत्त्वपूर्ण निकायहरूमा नियुक्ति र नियमावलीहरू समेत स्वीकृत गरेको छ।
विभिन्न निकायमा नियुक्ति र नियमावली स्वीकृत
मन्त्रिपरिषद्ले विशिष्ट संरचना सञ्चालन तथा व्यवस्थापन विकास समितिको रिक्त कार्यकारी निर्देशक पदमा धनकुटाका धर्मराज खड्कालाई नियुक्त गर्ने निर्णय गरेको छ। त्यस्तै, गोरखापत्र संस्थानको महाप्रबन्धक पदमा कैलालीका हिक्मतबहादुर रावल र सुरक्षण मुद्रण केन्द्रको कार्यकारी निर्देशक पदमा मोरङका देवराज ढुङ्गाना नियुक्त भएका छन्।
बैठकले कमैया श्रम निषेध गर्ने सम्बन्धी पहिलो संशोधन नियमावली, २०८३ र शिक्षा दशौँ संशोधन नियमावली, २०८३ लाई स्वीकृत गरेको छ। यसका साथै राष्ट्रिय सदाचार नीति, २०८३ र राष्ट्रिय विज्ञापन नीति, २०८३ लाई पनि सरकारले स्वीकृत गर्ने निर्णय गरेको छ।
विधेयकहरू संसदमा पेस गरिने
सरकारले अर्थ सम्बन्धी केही नेपाल कानूनलाई संशोधन र खारेज गर्न बनेको विधेयक सङ्घीय संसद्मा पेश गर्न स्वीकृति दिने निर्णय गरेको छ।
त्यस्तै, ‘एग्रिमेण्ट अन्डर द युनाइटेड नेसन कन्भेन्सन अन द ल अफ द सी अन द कन्जर्भेसन एण्ड सस्टेनेबल युज अफ मरिन बायोलोजिकल डाइभर्सिटी अफ एरियाज बियोण्ड नेसनल जुरिसडिक्सन’ लाई अनुमोदनका लागि सङ्घीय संसद्मा पेस गर्न स्वीकृति दिने निर्णय पनि भएको छ।
प्रतिक्रिया