विश्वकप फुटबल प्रतियोगितामा ७२ वटा खेलहरू सकिएका छन् भने अब केवल ३२ खेलहरू मात्र बाँकी रहेका छन्। ह्यारी केन र थॉमस टुचेलले यस विश्वकपलाई दुईवटा छुट्टाछुट्टै प्रतियोगिता जस्तो रहेको बताएका छन्।
पहिलो चरणको खेलहरू इतिहास बनिसकेका छन् र ती खेलहरू निकै रमाइला पनि रहे। यस क्रममा थुप्रै कीर्तिमानहरू तोडिए भने कमजोर मानिएका टोलीहरूले उत्कृष्ट कथा रचे र गोल्डेन बुटको दौड पनि निकै रोमाञ्चक बन्यो।
यस खेलमा खेलाडीहरुले सुपरकम्प्युटरको अनुमानलाई समेत गलत साबित गरिदिएका छन्। तेस्रो स्थानमा रहेका उत्कृष्ट आठ टोलीमध्ये सातवटा टोलीले दोस्रो चरणमा पुग्नका लागि ४ अंक नै जोड्नुपर्यो।
आइतबार रातिदेखि सुरु हुने यो दोस्रो चरण निकै रोमाञ्चक र क्लासिक नकआउट हुनेछ। यस चरणमा सबै ठूला नाम चलेका खेलाडी, डार्क हर्स टोली र केही काल्पनिक जस्ता लाग्ने अनौठा कथाहरू समावेश रहेका छन्।
साउन ४ गते न्यूयोर्क न्यू जर्सी स्टेडियममा हुने फाइनल खेलतर्फको यात्रामा अन्तिम ३२ का खेलहरूमा निकै चाखलाग्दा उपकथाहरू र रोमाञ्चक भिडन्तहरू हेर्न पाइनेछ। यी १६ वटा भिडन्तहरूमध्ये प्रत्येक खेल तपाईंले किन हेर्नुपर्छ भन्ने कारणहरू यहाँ प्रस्तुत गरिएको छ।
आइतबार, असार १४
दक्षिण अफ्रिका विरुद्ध क्यानाडा
यो दुवै राष्ट्रका लागि एउटा नयाँ र ऐतिहासिक अवसर हो, किनभने यसअघि यी दुवै टोली कहिल्यै पनि नकआउट चरणमा पुग्न सकेका थिएनन्। क्यानाडाले आफ्नो घरेलु मैदान छाडेर बाहिर आएको भए तापनि धेरै संख्यामा प्रशंसकहरू खेल हेर्नका लागि लस एन्जलस जाने अपेक्षा गरिएको छ।
सोमबार, असार १५
ब्राजिल विरुद्ध जापान
यो खेल उत्कृष्ट खेलाडीहरू र बलियो रणनीतिक प्रणालीबीचको भिडन्त हो। यो यस्तो खेल हो जसले विश्वकपको वास्तविक रोमान्च झल्काउँछ—जहाँ ‘सेलेसाओ’ (ब्राजिल) को सामना ‘सामुराई ब्लु’ (जापान) सँग हुँदैछ। धेरैले रुचाएको जापानले गत असोजमा पाँच पटकको च्याम्पियन ब्राजिललाई ३-२ ले हराएको थियो र अहिले २० वर्षपछि, सन् २००६ को समूह चरणमा व्यहोरेको ४-१ को हारको बदला लिने सोचमा जापान मैदान उत्रिनेछ।
जर्मनी विरुद्ध पराग्वे (राति ९:३० बजे) पराग्वेले सन् २००२ को अन्तिम १६ मा व्यहोरेको १-० को हारको बदला लिने उद्देश्यका साथ जर्मन टोली ‘डाई मानसफ्ट’ को सामना गर्नेछ। यस खेलको विजेताले अर्को चरणमा फ्रान्सको सामना गर्नुपर्ने सम्भावना रहेको छ।
मंगलबार, असार १६
नेदरल्याण्ड्स विरुद्ध मोरक्को यो यस चरणकै सबैभन्दा रोमाञ्चक भिडन्त हुन सक्छ। प्रतियोगिताको विजेता बन्न सक्ने अनुमान गरिएको नेदरल्याण्ड्सले चार वर्षअघि सेमिफाइनलसम्मको यात्रा तय गरेको मोरक्कोको सामना गर्दैछ। मोरक्कोले हालै आफ्नो मिडफिल्डमा १८ वर्षका उत्कृष्ट प्रतिभावान खेलाडी अयुब बुआड्डीलाई पनि थपेको छ।
आइभोरी कोस्ट विरुद्ध नर्वे यो खेललाई एउटा रोक्नै नसकिने शक्ति र नहल्लिने पर्खालबीचको टक्करका रूपमा हेरिएको छ। अर्थात्, १० वटा छनोट खेलहरूमा एउटै पनि गोल नव्यहोरेको आइभोरी कोस्टको रक्षापंक्ति र अर्लिङ हालान्डबीचको भिडन्त। यहाँ एउटा कुरा के निश्चित छ भने, नर्वेका प्रशंसकहरू ‘भाइकिङ रोइङ’ (एक प्रकारको खुसीयाली मनाउने शैली) गर्दै डालस पुग्नेछन्।
फ्रान्स विरुद्ध स्वीडेन फ्रान्सको अग्रपंक्तिमा उत्कृष्ट खेलाडीहरूको बाहुल्यता रहेको कुरा हामी सबैलाई थाहा नै छ, तर मैदानको अर्कोतर्फ भने एउटा निकै चाखलाग्दो भिडन्त हेर्न पाइनेछ—जहाँ भिक्टर ग्योकेरेस र उनका आर्सनलका सहकर्मी विलियम सालिबा आमनेसामने हुनेछन्। यी प्रिमियर लिग विजेताहरूमध्ये कसले बाजी मार्ला भन्ने कुरा हेर्न निकै रोचक हुनेछ।
बुधबार, असार १७
मेक्सिको विरुद्ध इक्वेडर मेक्सिकोको एस्टेका स्टेडियममा हुने खेलको रौनक हेर्नका लागि बिहान चाँडै उठ्नु पनि सार्थक हुनेछ। यस खेलबाट इंग्ल्याण्डले अन्तिम १६ मा सामना गर्न सक्ने सम्भावित प्रतिद्वन्द्वीको खेल शैलीबारे बिहानको खाजा खानुअघि नै जानकारी पाउन सकिन्छ।
इंग्ल्याण्ड विरुद्ध प्रजातान्त्रिक गणतन्त्र कङ्गो (साझ ५:०० बजे) थॉमस टुचेलको टोली इंग्ल्याण्डका लागि यो यस प्रतियोगिताकै एकमात्र यस्तो खेल हो जुन पारिवारिक रूपमा हेर्न मिल्ने अनुकूल समयमा सुरु हुनेछ।
बेल्जियम विरुद्ध सेनेगल
दुवै टोलीले समूह चरणको अन्तिम समयमा मात्र आफ्नो उत्कृष्ट खेल प्रदर्शन गरेका थिए। बेल्जियमको ‘गोल्डेन जेनेरेसन’ मा अझै पनि केही जादु बाँकी रहेको संकेतहरू देखिएका छन्। अर्कोतर्फ, सेनेगल आधिकारिक रूपमा तेस्रो स्थानमा रहने टोलीहरूमध्ये सबैभन्दा कमजोर रुपमा छनोट भएको भए तापनि उसले फ्रान्स, नर्वे र इराक विरुद्धका खेलहरूमा ८ गोल गर्न सफल भएको थियो। अहिले उनीहरूको मैदान बाहिरको विवाद पनि साम्य भइसकेको देखिन्छ।
बिहीबार, असार १८
अमेरिका विरुद्ध बोस्निया-हर्जगोभिना जुलाई ४ को स्वतन्त्रता दिवस आउन केही दिन बाँकी भए पनि सह-आयोजक अमेरिका उच्च मनोबलका साथ सन फ्रान्सिस्को खाडी क्षेत्रमा मैदान उत्रिनेछ। समूह चरणको आफ्नो अन्तिम प्रतिष्ठाको लडाइँमा टर्कीसँग झिनो अन्तरले पराजित भए पनि अमेरिकाको उत्साह कम भएको छैन। उता गत चैतमा इटालीलाई पाखा लगाउँदै छनोट भएको बोस्नियाली टोलीले भने सुरुवाती चरणमा उति धेरै प्रभाव जमाउन सकेको देखिँदैन।
स्पेन विरुद्ध अस्ट्रिया यो खेल दुई फरक शारीरिक वनोट र खेल शैलीबीचको भिडन्त हुने देखिन्छ। चोटमुक्त भई टोलीमा फर्किएका लामिन यामाल र युरोपेली च्याम्पियन स्पेनले अलि आक्रामक रणनीति अपनाउने अस्ट्रियाको सामना गर्नेछ। अस्ट्रिया समूह चरणको आफ्नो अन्तिम खेलको अन्तिम सेकेन्डमा गोल गर्दै निकै कठिन रूपमा यस चरणमा आइपुगेको हो।
शुक्रबार, असार १९
पोर्चुगल विरुद्ध क्रोएसिया अबको चार वर्षपछि हुने अर्को विश्वकपमा ४० वर्षका लुका मोड्रिच वा ४१ वर्षका क्रिस्टियानो रोनाल्डोलाई सायद मैदानमा देख्न पाइने छैन। त्यसैले यी दुई महान् खेलाडीमध्ये एक जनाको विश्वकप यात्रा शुक्रबार बिहानै टुंगिने निश्चित देखिन्छ।
स्विट्जरल्याण्ड विरुद्ध अल्जेरिया १३ पटक विश्वकप खेल्दा केवल चार पटक मात्र समूह चरणबाट बाहिरिएको स्विट्जरल्याण्ड सधैं महत्त्वपूर्ण चरणमा देखिने टोली हो। तर नकआउट चरणमा लगातार आठौं प्रयासमा पहिलो जितको खोजीमा रहेको स्विट्जरल्याण्डले यस पटक अल्जेरियाको सामना गर्दैछ। अल्जेरियाको टोलीमा २० वर्षका प्रतिभावान खेलाडी इब्राहिम माजा रहेका छन्, जसको उत्कृष्ट खेलका कारण उनलाई ‘माजाडोना’ उपनामले समेत चिनिन्छ।
अष्ट्रेलिया विरुद्ध इजिप्ट इजिप्टका लागि सर्वाधिक गोल गर्ने कीर्तिमान बनाउने मोहम्मद सलाहको दौड यो खेलको एउटा निकै चाखलाग्दो पाटो हो। विशेष कुरा के छ भने सलाहले जुन खेलाडीको कीर्तिमान पछ्याउँदै छन्, उनी अरू कोही नभएर उनकै प्रशिक्षक होसाम हसन हुन्। हसनले अघिल्लो खेलमा सलाह कीर्तिमान बराबरी गर्न केवल एक गोलले पछि परेका बेला दोस्रो हाफको १२ औं मिनेटमै मैदानबाट बाहिर निकालेका थिए।
अर्जेन्टिना विरुद्ध केप भर्ड जारी प्रतियोगितामा ६ गोल गरिसकेका लियोनेल मेस्सी र केप भर्डका ४० वर्षका अनुभवी गोलकिपर भोजिन्हाबीचको यो भिडन्त कागजमा हेर्दा विश्वकपकै सबैभन्दा नमिल्दो जोडी जस्तो देखिन सक्छ। तर यी अनुभवी गोलकिपरले यसै प्रतियोगितामा दुई खेलमा एउटै पनि गोल हुन नदिई आफ्नो देशका लागि नायक बनिसकेका छन्।
शनिबार, असार २०
कोलम्बिया विरुद्ध घाना विश्वकपका खेलहरूमा रंगशालाको दृश्य र ध्वनि सधैं विशेष हुने गर्दछ र कान्सास सहरमा हुने यो भिडन्तले दर्शकलाई छुट्टै रोमान्च दिनेछ। कोलम्बियाका खेलहरू अहिलेसम्म निकै हेर्नलायक रहेका छन्, जहाँ पहेंलो जर्सीमा सजिएका भावुक समर्थकहरूले रंगशाला भर्दै राष्ट्रिय गान गुञ्जाइरहेका छन्। अर्कोतर्फ घानाका समर्थकहरूले पनि उनीहरूलाई निकै कडा टक्कर दिने अपेक्षा गरिएको छ।बीबीसी
प्रतिक्रिया