चालु आर्थिक वर्ष सकिन १९ दिन मात्रै बाँकी रहँदा सरकारले राजश्व सङ्कलनमा लक्ष्यको ७५ दशमलव १७ प्रतिशत मात्रै प्रगति हासिल गरेको छ । महालेखा नियन्त्रक कार्यालयका अनुसार शुक्रबारसम्म रु ११ खर्ब १२ अर्ब ४८ करोड ४६ लाख राजस्व सङ्कलन भएको छ ।
सरकारले चालु आर्थिक वर्षका लागि कुल रु १४ खर्ब ८० अर्ब बराबर राजस्व सङ्कलन गर्ने लक्ष्य राखेको थियो । लक्ष्य भेटाउन अब बाँकी अवधिमा रु ३ खर्ब ६७ अर्ब ५१ करोड राजश्व सङ्कलन गर्नुपर्ने हुन्छ, जसका लागि दैनिक करिब रु १९ अर्ब ३४ करोड उठाउनुपर्ने दबाब सरकारलाई छ ।
कर राजस्व सङ्कलनतर्फ सरकारले लक्ष्यको ७६ दशमलव २० प्रतिशत प्रगति हासिल गरेको छ । यस शीर्षकमा रु १३ खर्ब २५ अर्ब ५८ करोड ३९ लाख सङ्कलन गर्ने लक्ष्य रहेकामा हालसम्म रु १० खर्ब १० अर्ब १६ करोड ३ लाख सङ्कलन भएको छ ।
गैरकर राजस्वतर्फ रु १ खर्ब ५४ अर्ब ४१ करोड ६१ लाख सङ्कलन गर्ने लक्ष्य राखिएकामा हालसम्म रु १ खर्ब २ अर्ब ३२ करोड ४३ लाख प्राप्त भएको छ । वैदेशिक अनुदानतर्फ भने रु ५३ अर्ब ४४ करोड ६९ लाख प्राप्त गर्ने लक्ष्य रहेकामा हालसम्म ४५ दशमलव ११ प्रतिशत अर्थात् रु २४ अर्ब ११ करोड १२ लाख मात्रै जुटेको छ ।
समीक्षा अवधिमा अन्य प्राप्ति शीर्षकमा रु ६ अर्ब ५० करोड ५३ लाख सङ्कलन भएसँगै सरकारको कुल प्राप्ति रु ११ खर्ब ४३ अर्ब १० करोड ११ लाख पुगेको छ । यो वार्षिक लक्ष्यको ७४ दशमलव ५४ प्रतिशत हो भने कुल सरकारी खर्चतर्फ रु १४ खर्ब ४ अर्ब ९८ करोड ८६ लाख अर्थात् ७१ दशमलव ५३ प्रतिशत खर्च भएको छ ।
दैनिक खर्चको विवरण हेर्दा शुक्रबार मात्रै रु ५ अर्ब ३६ करोड ८२ लाख खर्च भएको देखिन्छ । कुल खर्चमध्ये चालुतर्फ रु ११ खर्ब ८० अर्ब ९८ करोडको लक्ष्य राखिएकामा ८० दशमलव ४२ प्रतिशत अर्थात् रु ९ खर्ब ४९ अर्ब ७५ करोड ९५ लाख खर्च भइसकेको छ ।
विकास निर्माणको काममा खर्च हुने पूँजीगततर्फको प्रगति भने निकै सुस्त देखिएको छ । चालु आवका लागि रु ४ खर्ब ७ अर्ब ८८ करोड ८० लाख पूँजीगत खर्च गर्ने लक्ष्य तय गरिएकामा हालसम्म ३४ दशमलव ८७ प्रतिशत अर्थात् रु १ खर्ब ४२ अर्ब २३ करोड ६८ लाख मात्रै खर्च भएको छ ।
ऋणको साँवा तथा ब्याज भुक्तानीका लागि गरिने वित्तीय व्यवस्थापनतर्फको खर्च भने ८३ दशमलव ४१ प्रतिशत पुगेको छ । यस शीर्षकमा कुल रु ३ खर्ब ७५ अर्ब २४ करोड २० लाख लक्ष्य रहेकामा रु ३ खर्ब १२ अर्ब ९९ करोड २३ लाख खर्च भएको महालेखा नियन्त्रक कार्यालयले जनाएको छ ।
प्रतिक्रिया