फिफा विश्वकप २०२६ अन्तर्गत समूह चरणका खेलहरू अन्तिमतिर पुग्दा २८ टोलीले नकआउट चरण (राउन्ड अफ ३२) मा आफ्नो स्थान सुरक्षित गरेका छन्। प्रतियोगिताबाट हालसम्म १२ टोली बाहिरिइसकेका छन् भने बाँकी ४ स्थानका लागि टोलीहरूबीच रोचक प्रतिस्पर्धा हुने देखिएको छ।
सह-आयोजक मेक्सिको समूह ‘ए’ बाट दक्षिण कोरियालाई पराजित गर्दै नकआउट चरणमा पुग्ने पहिलो टोली बनेको थियो। लगत्तै समूह ‘डी’ बाट अस्ट्रेलियालाई हराउँदै अमेरिका दोस्रो टोलीका रूपमा अर्को चरणमा प्रवेश गरेको हो।
ठूला टोलीको उत्कृष्ट पुनरागमन र छनोट
अघिल्ला विश्वकपमा समूह चरणबाटै बाहिरिएको जर्मनी यसपटक आइभोरी कोस्टलाई २-१ ले हराउँदै अन्तिम ३२ मा पुगेको छ। साविक विजेता अर्जेन्टिनाका लागि लियोनेल मेसीले अस्ट्रियाविरुद्ध दुई गोल गर्दै विश्वकप इतिहासमै सर्वाधिक १८ गोल गर्ने कीर्तिमान बनाएपछि टोली अर्को चरणमा पुगेको हो।
फ्रान्सका किलियन एम्बाप्पेले उत्कृष्ट प्रदर्शन गर्दै इराकविरुद्ध दुई गोल गरेर टोलीलाई नकआउट चरण पुर्याएका छन्। ब्राजिलले स्कटल्यान्डलाई ३-० ले हराएर समूह ‘सी’ को शीर्ष स्थानमा रहँदै यात्रा सुरक्षित गर्दा भिनिसियस जुनियरले दुई गोल गरे।
ऐतिहासिक सफलता र निराशाजनक बहिर्गमन
यसपटक केप भर्डेले पहिलो सहभागितामै दोस्रो स्थान हासिल गर्दै नकआउट चरण पुगेर इतिहास रचेको छ। दक्षिण अफ्रिका पनि विश्वकप इतिहासमै पहिलोपटक नकआउट चरणमा पुग्न सफल भएको छ।
अर्कातर्फ, सन् १९७४ पछि पहिलोपटक विश्वकप खेलेको हाइटी लगातार दुई हारसँगै प्रतियोगिताबाट बाहिरिने पहिलो टोली बन्यो। २४ वर्षपछि फर्किएको टर्की र सन् २०२२ को आयोजक कतार पनि समूह चरणबाटै बाहिरिएका छन्।
उरुग्वे, साउदी अरेबिया र इराक जस्ता टोलीले पनि यसपटक समूह चरण पार गर्न सकेनन्।
नकआउट चरणमा पुगेका २८ टोलीहरू
मेक्सिको, अमेरिका, जर्मनी, अर्जेन्टिना, फ्रान्स, नर्वे, कोलम्बिया, स्विट्जरल्यान्ड, क्यानडा, बोस्निया एन्ड हेर्जेगोभिना, ब्राजिल, मोरक्को, दक्षिण अफ्रिका, इक्वेडर, आइभोरी कोस्ट, नेदरल्यान्ड्स, जापान, स्वीडेन, अस्ट्रेलिया, पराग्वे, बेल्जियम, इजिप्ट, स्पेन, केप भर्डे, सेनेगल, पोर्चुगल, इङ्गल्यान्ड र घाना।
प्रतियोगिताबाट बाहिरिएका १२ टोलीहरू
हाइटी, टर्की, ट्युनिसिया, जोर्डन, पानामा, कतार, चेकिया, कुरासाओ, न्युजिल्यान्ड, उरुग्वे, साउदी अरेबिया र इराक।
प्रतिक्रिया