सानिगाड हाइड्रो लिमिटेडले सर्वसाधारण लगानीकर्ताका लागि निष्काशन गरेको साधारण शेयर (आईपीओ) मा आवेदन दिने बिहीबार अन्तिम दिन रहेको छ । कम्पनीले जेठ १८ गते, सोमबारदेखि यो आईपीओ बिक्रीमा ल्याएको थियो ।
यसअघि आयोजना प्रभावित क्षेत्रका स्थानीय र वैदेशिक रोजगारीमा रहेका नेपालीका लागि शेयर बाँडफाँट गरिसकेर बाँकी शेयर सर्वसाधारणलाई खोलिएको हो । कम्पनीले कर्मचारी र सामूहिक लगानी कोषका लागि समेत शेयर सुरक्षित गरी बाँडफाँट गरिसकेको छ ।
४६ लाखभन्दा बढी कित्ता बिक्रीमा
कम्पनीले कुल २ अर्ब ८५ करोड रुपैयाँ जारी पूँजीको ३० प्रतिशत शेयर निष्काशन गर्ने अनुमति पाएको थियो । अहिले सर्वसाधारणका लागि भने ४६ करोड ७४ लाख रुपैयाँ बराबरको ४६ लाख ७४ हजार कित्ता शेयर निष्काशन गरिएको छ ।
लगानीकर्ताले न्यूनतम १० कित्ता र अधिकतम २० हजार कित्तासम्मका लागि आवेदन दिन सक्नेछन् । यो आईपीओमा नेपाल धितोपत्र बोर्डबाट अनुमति प्राप्त बैंक तथा वित्तीय संस्था र सि-आस्बा प्रणालीमार्फत आवेदन दिन सकिन्छ ।
मध्यम जोखिम र आयोजना विवरण
इक्रा नेपालले यो निष्काशनलाई ‘इक्रएनपी इस्यूअर रेटिङ्ग डबल बी माइनस’ प्रदान गरेको छ । यसले कम्पनीको वित्तीय दायित्व पूरा गर्ने क्षमतामा मध्यम जोखिम रहेको देखाउँछ ।
कम्पनीले ३८ दशमलव ४६ मेगावाटको माथिल्लो कालंगागाड जलविद्युत आयोजना सञ्चालन गरिरहेको छ । ८ अर्ब ६८ करोड ७० लाख रुपैयाँ कुल लागत रहेको यस आयोजनाको प्रतिमेगावाट लागत २२ करोड ५८ लाख रुपैयाँ छ ।
लगानी फिर्ता हुने अवधि
यस जलविद्युत आयोजनाको विद्युत उत्पादन अनुमतिपत्रको अवधि २५ वर्ष ३ महिना बाँकी रहेको छ । आयोजनाको साधारण लगानी फिर्ता हुने अवधि ८ दशमलव २५ वर्ष र डिस्काउण्टमा लगानी फिर्ता हुने अवधि १४ दशमलव ६९ वर्ष अनुमान गरिएको छ ।
यो शेयर निष्काशन तथा बिक्री प्रबन्धकको काम लक्ष्मी सनराइज क्यापिटल लिमिटेडले गरिरहेको छ । लगानीकर्ताले बिहीबार बैंकिङ्ग समयभित्र यसमा आवेदन दिइसक्नुपर्नेछ ।
प्रतिक्रिया