फिफा विश्वकप २०२६ अन्तर्गत समूह ‘एच’ को रोमान्चक खेलमा नवप्रवेशी टोली केप भर्डेले पूर्व विश्व विजेता उरुग्वेलाई २-२ गोलको बराबरीमा रोक्दै इतिहास रचेको छ ।
अमेरिकाको मियामी रंगशालामा सोमबार बिहान भएको खेलमा केप भर्डेले बलियो उरुग्वेविरुद्ध उत्कृष्ट प्रदर्शन गर्दै अंक खोस्न सफल भयो ।
यसअघि आफ्नो पहिलो खेलमा स्पेनलाई गोलरहित बराबरीमा रोकेको केप भर्डेले प्रतियोगितामा लगातार दोस्रो अप्रत्याशित नतिजा निकालेको हो । यो बराबरीसँगै समूह ‘एच’ मा दुवै टोलीले समान २ अंक जोडेका छन् ।
खेलको २१ औँ मिनेटमा केप भर्डेका केभिन पिनाले फ्रिकिकमार्फत उत्कृष्ट गोल गर्दै टोलीलाई सुरुवाती अग्रता दिलाएका थिए । यो गोल केप भर्डेको विश्वकप इतिहासकै पहिलो गोल समेत बन्यो ।
खेलमा पछि परेको उरुग्वेले पहिलो हाफको अन्तिम समयमा उत्कृष्ट पुनरागमन गर्यो । उरुग्वेका लागि ४४ औँ मिनेटमा माक्सिमिलियानो अराउजोले बराबरी गोल फर्काए भने पहिलो हाफको इन्जुरी समयको छैटौँ मिनेटमा अगस्टिन कानोबियोले गोल गर्दै टोलीलाई २-१ को अग्रता दिलाए ।
दोस्रो हाफमा केप भर्डेले खेलमा फर्कन लगातार प्रयास जारी राख्यो । खेलको ६१ औँ मिनेटमा उरुग्वेका डिफेन्डर म्याथियास ओलिभेराले खराब ब्याक पास दिएपछि केप भर्डेले त्यसको फाइदा उठायो ।
मैदान प्रवेश गरेको केही मिनेटमै केप भर्डेका वैकल्पिक खेलाडी हेलियो भारेलाले उरुग्वेका गोलरक्षक फर्नान्डो मुस्लेरा अघि बढेको अवस्थामा बललाई खाली पोस्टको दिशा दिँदै खेल २-२ को बराबरीमा ल्याए ।
बाँकी समयमा उरुग्वेले गोलका केही अवसर बनाए पनि केप भर्डेको रक्षापंक्तिले त्यसलाई विफल पार्दै ऐतिहासिक अंक सुरक्षित गर्यो ।
प्रतिक्रिया