दूरसञ्चार सेवा प्रदायक कम्पनी एनसेलले प्रतिष्ठित अन्तर्राष्ट्रिय मापदण्ड आईएसओ ९००१ र १४००१ को मान्यता प्राप्त गरेको छ। यो मान्यताले कम्पनीको उच्च गुणस्तरीय सेवा प्रदान गर्ने र वातावरणीय प्रभावलाई न्यूनतम राख्ने प्रतिबद्धतालाई बलियो बनाएको छ।
आईएसओ ९००१ ले ग्राहकका आवश्यकता र नियामक निकायका प्रावधानहरू पूरा गर्ने प्रणालीलाई सुनिश्चित गर्दछ। त्यसैगरी, आईएसओ १४००१ ले वातावरणीय व्यवस्थापन प्रणालीको मापदण्ड निर्धारण गर्दै संस्थालाई फोहोरमैला व्यवस्थापन र कानुनी पालनामा मार्गदर्शन गर्दछ।
सेवा र सुरक्षाको अन्तर्राष्ट्रिय ग्यारेन्टी
यसअघि डाटा सुरक्षा र गोपनीयताका लागि आईएसओ २७००१:२०२२ र आईएसओ २७७०१:२०१९ मान्यता पाइसकेको एनसेलले थप दुई विधामा यो सफलता पाएको हो। एनसेलका प्रमुख कार्यकारी अधिकृत माइकल फोलेले यी नयाँ मान्यताहरूले प्रदान गर्ने सेवाको गुणस्तर र विश्वव्यापी मापदण्ड अनुसार व्यवसाय सञ्चालन भइरहेको पुष्टि गर्ने बताए।
उनले बी टु सी, बी टु बी वा बी टु जी जुनसुकै सेवामा पनि गुणस्तर सुनिश्चित गरिएको उल्लेख गरे। एनसेलले पुस २ हजार ८१ मा प्राप्त गरेको डाटा सुरक्षा सम्बन्धी प्रमाणीकरण यो वर्ष पनि नवीकरण गराउन सफल भएको छ।
नेपालकै पहिलो दूरसञ्चार कम्पनी
यो विशिष्ट प्रमाणीकरण प्राप्त गर्ने एनसेल नेपालको पहिलो दूरसञ्चार सेवा प्रदायक कम्पनी बनेको छ। यसले नेपालको डिजिटल परिदृश्यमा कम्पनीको उत्कृष्ट सञ्चालन र दिगोपनप्रतिको ध्यानलाई पुष्टि गर्दछ।
यसबाट आम ग्राहकले थप भरपर्दो नेटवर्क, उत्तम सेवा र वातावरणीय रूपमा जिम्मेवार सञ्चालनको भरोसा पाउनेछन्। त्यस्तै उद्यमी तथा व्यवसायहरूले दक्षता वृद्धि र बढी प्रतिस्पर्धात्मक क्षमता प्राप्त गर्ने देखिन्छ।
साझेदार, नियामक निकाय तथा लगानीकर्ताहरूले कम्पनीको जवाफदेहिता र निरन्तर सुधारप्रतिको प्रतिबद्धताबाट आत्मविश्वास प्राप्त गर्न सक्नेछन्। यी प्रमाणीकरणको सदुपयोग गर्दै विश्वस्तरीय डिजिटल सेवा र पर्यावरणीय संरक्षणलाई प्रवद्र्धन गर्न कम्पनी लागिपरेको छ।
प्रतिक्रिया