स्ट्रेट अफ होर्मुज जलमार्ग बन्द हुँदा १ हजार २ सयभन्दा बढी मालवाहक जहाजहरू १२५ अर्ब अमेरिकी डलर बराबरको सामानसहित यस क्षेत्रमा फसेका छन् । बेलायती सञ्चारमाध्यम फाइनान्सियल टाइम्स (एफटी) ले बुधबार बीमा कम्पनी एलियान्जको पछिल्लो प्रतिवेदनलाई उद्धृत गर्दै यो विवरण सार्वजनिक गरेको हो ।
एलियान्जका समुद्री प्रमुख जस्टस हेनरिकले महत्त्वपूर्ण जलमार्ग बन्द हुनाले बीमा कम्पनीहरूका लागि जोखिम वहनको ढाँचा नै परिवर्तन गरिदिएको बताएका छन् । यो मार्ग अवरुद्ध हुँदा विश्वव्यापी आपूर्ति शृङ्खलामा ठूलो असर परेको प्रतिवेदनमा उल्लेख छ ।
संयुक्त राज्य अमेरिका र इरानबीच सम्झौता घोषणा भएसँगै स्ट्रेट अफ होर्मुज खोल्ने निर्णय भएपछि अहिले ढुवानी यातायात बिस्तारै सहज बन्दै गएको छ । आधिकारिक तथ्याङ्क अनुसार अघिल्लो हप्ता ६९ वटा जहाजहरू खाडीबाट बाहिर निस्किएका छन्, जबकी त्यसको एक हप्ता अघि २४ वटा जहाज मात्र बाहिरिएका थिए ।
गत फेब्रुअरी महिनामा द्वन्द्व भड्किएयताको सबैभन्दा बढी साप्ताहिक ढुवानी मात्रा यही हप्ता रेकर्ड गरिएको छ । जलमार्ग खुलेसँगै केही महिनादेखि रोकिएका मालवाहक जहाजहरू आफ्नो गन्तव्यतर्फ लाग्न थालेका छन् ।
लामो समयसम्म समुद्री क्षेत्रमा अलपत्र पर्नुपर्दा र द्वन्द्वका कारण गम्भीर हताहती हुँदा चालक दलका सदस्यहरूमा ठूलो मानसिक तथा मानवीय सङ्कट देखिएको छ । अन्तर्राष्ट्रिय सामुद्रिक सङ्गठनका अनुसार यो द्वन्द्वका कारण अहिलेसम्म १४ जना डुङ्गा चालकहरूको मृत्यु भइसकेको छ ।
त्यस्तै सुरक्षा जोखिमका बीच व्यापारिक मार्गमा रहेका ४० वटाभन्दा बढी जहाजहरूमा क्षेप्यास्त्र आक्रमण भएको सङ्गठनले जनाएको छ । यसले गर्दा आर्थिक नोक्सानी मात्र नभई मानवीय क्षति समेत निकै ठूलो भएको छ ।
प्रतिक्रिया