अर्जेन्टिनाका कप्तान लियोनल मेस्सीले फुटबल इतिहासमा अर्को एउटा स्वर्णिम पाना थपेका छन्। सन् २०१६ मा अन्तर्राष्ट्रिय फुटबलबाट सन्न्यास घोषणा गरेका मेस्सीले अहिले विश्वकप इतिहासमै सबैभन्दा बढी गोल गर्ने कीर्तिमान आफ्नो नाममा लेखाएका छन्।
कोपा अमेरिकाको फाइनलमा चिलीसँग पराजित भएपछि भावुक बन्दै उनले राष्ट्रिय टोलीबाट आफ्नो यात्रा सकिएको बताएका थिए।
त्यस बेला लगातार चौथो प्रमुख फाइनल हारेको पीडा सहन नसकेर उनले सन्न्यासको निर्णय लिएका थिए। तर पछि सन्न्यास फिर्ता लिने उनको निर्णय अर्जेन्टिना र उनको आफ्नै खेल जीवनका लागि ऐतिहासिक कोसेढुङ्गा साबित भयो। त्यसयता उनले देशलाई लगातार दुई पटक कोपा अमेरिका र सन् २०२२ मा विश्वकपको उपाधि दिलाए।
जारी विश्वकप २०२६ अन्तर्गत सोमबार भएको खेलमा अस्ट्रियाविरुद्ध २–० को जित निकाल्ने क्रममा मेस्सीले दुवै गोल गरे। खेलको आठौँ मिनेटमा पेनाल्टी मिस गरे पनि उनले ३० मिनेटपछि उत्कृष्ट गोल गर्दै जर्मनीका मिरोस्लाभ क्लोजको १६ गोलको कीर्तिमान तोडेका थिए। मेस्सीले विश्वकपमा आफ्नो १७ औँ गोल गर्दै इतिहास रचेका हुन्।
खेलको दोस्रो हाफको इन्जुरी समयमा मेस्सीले अस्ट्रियाका दुई डिफेन्डरको बीचबाट आकर्षक गोल गर्दै टोलीको जित सुनिश्चित गरे। यो गोलसँगै विश्वकपमा उनको कुल गोल सङ्ख्या १८ पुगेको छ। ३९ वर्षको उमेरमा पनि मेस्सीले मैदानमा देखाएको यो जादुमय प्रदर्शनलाई खेल विश्लेषकहरूले अमर क्षणको रूपमा व्याख्या गरेका छन्।
प्रतिक्रिया