फिफा विश्वकपमा पहिलो पटक सहभागिता जनाएको केप भर्डेले ऐतिहासिक प्रदर्शन गर्दै अर्को चरणमा पुग्ने बलियो सम्भावना बनाएको छ । आफ्नो पहिलो खेलमै आफूभन्दा ६५ स्थान माथि रहेको स्पेनलाई बराबरीमा रोकेर विश्वलाई स्तब्ध पारेको टोलीले आफ्नो उत्कृष्ट लयलाई कायम राखेको छ ।
अट्लान्टिक महासागरमा अवस्थित ५ लाख २५ हजार जति जनसङ्ख्या भएको यो टापु राष्ट्रले आइतबार दुई पटकको विजेता उरुग्वेलाई २-२ को बराबरीमा रोकेर सनसनी मच्चायो । खेलभर आक्रामक र उच्च आत्मविश्वासी देखिएको टोलीले दुई ठूला फुटबल शक्तिहरूविरुद्ध उत्कृष्ट खेल प्रदर्शन गर्यो ।
सामाजिक सञ्जालमा चर्चा र पारिवारिक खुसी
पहिलो खेलमा उत्कृष्ट बचाउ गर्दै ४० हजारबाट सिधै १ करोड ५० लाख इन्स्टाग्राम फलोअर्स कमाएका गोलकिपर वोजिन्हाले यो खेलमा पनि राम्रो प्रदर्शन गरे । उरुग्वेलाई दुई पटक मात्र पोस्टको दिशामा प्रहार गर्न दिएको खेलमा केप भर्डेका फरवार्डहरूले उत्कृष्ट खेल देखाए ।
भिसा समस्याका कारण अमेरिकामा भएको स्पेनविरुद्धको पहिलो खेल हेर्न नपाएकी गोलकिपर वोजिन्हाकी आमा भने मियामीमा उपस्थित थिइन् । उनले रङ्गशालामै बसेर आफ्नो छोरो र टोलीको यो रोमान्चक ऐतिहासिक खेलको प्रत्यक्ष अनुभव लिइन् ।
उरुग्वेविरुद्ध आक्रामक खेल र ऐतिहासिक गोल
खेलको पहिलो मिनेटदेखि नै केप भर्डेले आक्रामक रणनीति अपनाउँदै उरुग्वेलाई लगातार दबाबमा राख्यो । दक्षिण अमेरिकी फुटबलको बलियो टोली उरुग्वे केप भर्डको तीव्र गतिको खेलका सामु निरिह देखिन्थ्यो ।
यसै क्रममा केप भर्डेले फुटबल इतिहासमै सम्झनायोग्य क्षण निर्माण गर्यो । केभिन पिनाले ३० यार्ड टाढाबाट प्रहार गरेको फ्री-किक उरुग्वेका डिफेन्डरहरूले उफ्रिने क्रममा ठाउँ छाड्दा सिधै जालीमा चुम्यो ।
गोलकिपर फर्नान्डो मुस्लेरालाई जिल्ला पार्दै बल गोलमा परिणत भएको थियो । टोलीले आफ्नो इतिहासकै पहिलो विश्वकप गोल गरेपछि केप भर्डको राजधानी प्रैयामा समर्थकहरूले ठूलो उत्सव मनाए ।
खेल विश्लेषकहरूले उरुग्वेविरुद्ध केप भर्डे पराजित हुने भविष्यवाणी गरे पनि टोलीले त्यसलाई गलत साबित गरिदियो । विपक्षीको गल्तीको फाइदा उठाउँदै हेलियो वारेलाले चलाखीपूर्ण रूपमा गोलकिपर मुस्लेरालाई छक्याएर बललाई पोस्टको दिशा दिएका थिए ।
दोस्रो गोलसँगै खेल बराबरीमा ल्याएपछि केप भर्डेले स्पेनविरुद्ध देखाएको जस्तै बलियो रक्षापंक्ति प्रदर्शन गर्यो । रक्षात्मक रूपमा बलियो देखिँदै टोलीले जितका लागि लगातार आक्रामक अवसरहरू समेत सिर्जना गरिरह्यो ।
खेल विज्ञ तथा समर्थकको मन जित्न सफल
यो प्रदर्शनपछि दक्षिण अफ्रिकाका पूर्व स्ट्राइकर बेनी म्याकार्थीले केप भर्डेप्रति आफ्नो सम्मान निकै बढेको बताए । उनले टोलीको बहादुरीको प्रशंसा गर्दै अन्तिम प्रहारमा थोरै सुधार गरेमा टोली अझै उत्कृष्ट हुने धारणा राखे ।
पूर्व डिफेन्डर एशली विलियम्सले यसलाई जारी विश्वकपकै सबैभन्दा मनोरञ्जक खेलको संज्ञा दिए । अमेरिकामा रहेका एक केप भर्डेका समर्थकले सुरुमा सबैले आफूहरूमाथि शङ्का गरे पनि अहिले इतिहास रचिरहेको भन्दै खुसी व्यक्त गरे ।
सुरुवाती दुई खेलमा अपराजित रहेको केप भर्ड नकआउट चरणमा पुग्ला त भन्ने कौतुहलता बढेको छ। उरुग्वेसँगको बराबरीपछि केप भर्डे समूह ‘एच’ को तेस्रो स्थानमा छ र आइतबारको प्रतिद्वन्द्वी उरुग्वे समान उसको पनि दुई अंक छ।
विश्वकपको यो नयाँ विस्तारित ढाँचाका कारण पहिलो पटक प्रतियोगिता खेलिरहेको केप भर्डेसँग नकआउटमा पुग्ने बलियो अवसर छ। अब केप भर्डेले समूह चरणको अन्तिम खेलमा शनिबार साउदी अरेबियाको सामना गर्नेछ।
साउदी अरेबियाले उरुग्वेसँग १-१ को बराबरी खेलेको थियो भने स्पेनसँग ४-० को हार ब्यहोरेको थियो। केप भर्डको यो खेल प्रदर्शनले साउदी अरेबियाविरुद्ध सहजै जित दिलाउने पूर्व खेलाडी म्याकार्थीले बीबीसी वानमा बताए।
अर्को चरण प्रवेशको गणित र इतिहास
नयाँ नियम अनुसार प्रत्येक समूहका शीर्ष दुई टोलीसँगै तेस्रो स्थानमा रहने उत्कृष्ट १२ मध्ये ८ टोली अन्तिम ३२ मा पुग्नेछन्। साउदी अरेबियाविरुद्धको खेलमा तीन अंक जोड्न सके केप भर्डे अर्को चरणमा पुग्ने निश्चित हुनेछ।
विश्वकप इतिहासमा केप भर्ड (६३ औं स्थान) भन्दा तल्लो वरीयतामा रहेर नकआउट चरण पुग्ने टोलीहरूमा सन् १९९८ मा नाइजेरिया (७४ औं) र सन् २०१८ मा रुस (७० औं) मात्र हुन्। साउदी अरेबियाविरुद्धको खेलमा केप भर्ड टोली उच्च मनोबलका साथ मैदान उत्रिएर इतिहास रच्न सक्षम रहेको विश्लेषक विलियम्सले बताए।
केप भर्डको प्रदर्शन हेर्नलायक: विज्ञहरूको प्रशंसा
केप भर्डेले ऐतिहासिक खेल प्रदर्शन गर्दै अंक खोस्न सफल भएपछि विश्वभरका फुटबल विज्ञहरूले टोलीको प्रशंसा गरेका छन् । खेलको विश्लेषण गर्दै इंग्ल्यान्डकी पूर्व खेलाडी सु स्मिथले केप भर्डेको खेल उत्कृष्ट रहेको र यो टोलीले नयाँ इतिहास रचिरहेको बताइन् ।
खेलभर केप भर्डेले उरुग्वे विरुद्ध १२ पटक प्रहार गरेकोमा ४ वटा प्रहार पोस्टको दिशामा थिए, जुन उरुग्वेको भन्दा दुई गुणा बढी हो । दोस्रो हाफमा खेललाई बराबरीमा ल्याएपछि केप भर्डले जितका लागि आक्रामक खेल खेल्दै १० पटक विपक्षीको पोस्टमा प्रहार गरेको थियो ।
उरुग्वे विरुद्धको बराबरीसँगै केप भर्ड सन् २००२ को सेनेगलपछि विश्वकपको सुरुवाती दुई खेलमा अपराजित रहने पहिलो नवप्रवेशी टोली बनेको छ । पूर्व डिफेन्डर एशली विलियम्सले केप भर्डले उरुग्वे विरुद्ध अंक खोस्न सफल हुनु ठूलो उपलब्धि भएको बताए ।
स्कटल्यान्डका पूर्व खेलाडी जेम्स म्याकफाडेनले केप भर्डका खेलाडीहरू मैदानमा दबाबरहित भएर खेलको भरपुर आनन्द लिइरहेको उल्लेख गरे । उनले यो टोलीको खेल हेर्नु निकै रमाइलो र उत्साहजनक अनुभव भएको प्रतिक्रिया दिए ।बीबीसी
प्रतिक्रिया