रुसमा ८.८ म्याग्निच्युडको शक्तिशाली भूकम्प, प्रशान्त महासागरभर सुनामीको चेतावनी

बुधबार बिहान रुसको कामचट्का प्रायद्वीपको पूर्वी तटमा ८.८ म्याग्निच्युडको शक्तिशाली भूकम्प गएको राष्ट्रिय भूकम्प विज्ञान केन्द्र (एनसीएस) ले जनाएको छ। यो भूकम्पले रुस, जापान, गुआम, हवाई, र अलास्कासहित प्रशान्त महासागरभर सुनामीको चेतावनी जारी गरिएको छ।

एनसीएसका अनुसार, भूकम्प ५२.५६ उत्तर अक्षांश र १६०.१० पूर्वी देशान्तरमा गएको थियो र यसको गहिराइ ५५ किलोमिटर थियो। अमेरिकी राष्ट्रिय मौसम सेवाले अलास्काको अलेउटियन टापुहरू (अट्टुदेखि समल्गा पाससम्म) का लागि सुनामी सल्लाहसहित सुनामी अलर्टहरूको शृङ्खला जारी गरेको छ। रुस र जापानमा सम्भावित सुनामीको खतरा रहेको जनाइएको छ।

जापानमा १ मिटरसम्म र रुसमा ३-४ मिटर अग्ला सुनामीका छालहरू आउन सक्ने चेतावनी दिइएको छ। हवाई, गुआम, र उत्तरी मारियाना टापुहरूका लागि पनि सुनामी सम्बन्धी सूचना जारी गरिएको छ। अमेरिकी भूगर्भीय सर्वेक्षण (युएसजीएस) का अनुसार, यो भूकम्प रुसको पेट्रोपाभ्लोभ्स्क-कामचात्स्कीबाट १३६ किलोमिटर पूर्व–दक्षिणपूर्वमा केन्द्रित थियो।

जापान मौसम विज्ञान एजेन्सीले भूकम्पपछि १ मिटर अग्लो सुनामी जापानको तटीय क्षेत्रमा पुग्न सक्ने बताएको छ। क्षेत्रीय आपत्कालीन मामिला मन्त्री सर्गेई लेबेदेवका अनुसार, कामचट्कामा ३-४ मिटर अग्ला सुनामीका छालहरू उत्पन्न भएका छन्। रुसको सरकारी समाचार संस्था तासका अनुसार, भागदौडका क्रममा केही मानिसहरू घाइते भएका छन्, जसमध्ये एक महिलाले झ्यालबाट हाम फालेर चोटपटक बेहोरेको बताइएको छ।

स्वास्थ्य मन्त्री ओलेग मेल्निकोभले घाइतेहरूको अवस्था ‘सामान्य’ रहेको र गम्भीर चोटपटकको कुनै खबर नआएको जानकारी दिएका छन्।

रुसी विज्ञान एकेडेमीको भूभौतिकीय सेवाको कामचट्का शाखाले यो भूकम्प सन् १९५२ यताकै सबैभन्दा शक्तिशाली भएको बताएको छ। साथै, ७.५ म्याग्निच्युडसम्मका पराकम्पहरू कम्तीमा एक महिनासम्म जारी रहने चेतावनी दिइएको छ। विगत १० दिनदेखि नै कामचट्कामा भूकम्पको शृङ्खला आइरहेको छ। जुलाई २० मा पेट्रोपाभ्लोभ्स्क-कामचात्स्की नजिकै ७.४ म्याग्निच्युडसहित पाँचवटा भूकम्प रेकर्ड गरिएको थियो।

जापानले प्रभावित तटीय क्षेत्रका बासिन्दाहरूलाई तुरुन्तै खाली गर्न आग्रह गरेको छ। यो खाली गर्ने चेतावनी सयौँ किलोमिटर लामो तटीय क्षेत्रमा लागू गरिएको छ। अधिकारीहरूले जारी गरेको सचेतना सन्देशमा भनिएको छ, “तुरुन्तै उच्च र सुरक्षित स्थानमा भाग्नुहोस्। सुनामीको आगमनको समय केवल अनुमान हो, छालहरू चाँडो वा ढिलो आउन सक्छन्। चेतावनी नहटुन्जेल सुरक्षित स्थानमा रहनुहोस्।”

सम्बन्धित सामाग्री

तेलङ्गनामा नेपाली संस्कृतिको न्यान्यो स्पर्श

पेट्रोलको मूल्य घट्यो, डिजेल र हवाई इन्धन बढ्यो

क्यानलाई एनपीएलकाे पहिलाे संस्करणबाट २ करोड ४६ लाख नाफा

सरकारले बाढीबाट क्षतिग्रस्त बिपी राजमार्ग पुनःस्थापना गर्न जापान सरकारको अनुदान स्वीकार गर्ने

वैदेशिक सहायता आयोजनामा कडाइ : पूर्ण तयारी भएका परियोजनालाई मात्र स्वीकृति

नागरिक उन्मुक्ति पार्टीको नयाँ अध्यक्षमा लालवीर चौधरी