बिहीबार, १० असार २०७८

अवरुद्ध सडक नखुल्दा तातोपानीवासी मर्कामा

समयपोष्ट २०७५ साउन १० गते १०:४३

– राम केसी

Advertisement

अरनिको राजमार्गको बाह्रबिसे–तातोपानी सडक खण्डका विभिन्न ठाउँमा पहिरो र नदी कटानले अवरुद्ध सडक लामो समयसम्म खुलाउने प्रयास नभएपछि सिन्धुपाल्चोक तातोपानीका बासिन्दाको दैनिक जीवन कष्टकर बनेको छ ।

गत असार अन्तिम सातामा सो सडक खण्डको विभिन्न स्थानमा पहिरो र नदी कटानले अवरुद्ध भएको तीन साता बित्न लाग्दा पनि सम्बन्धित निकायले अझै खुलाउने प्रयास नगरेपछि स्थानीय बासिन्दाको आवागमनमा कठिनाई पुगेको हो ।

Advertisement

गत असार २६ गतेको अविरल वर्षाले भोटेकोशीको बहाब बढेपछि नौ किलो भन्ने स्थानमा ७० मिटर सडक नदीले कटान गरेको थियो ।

तातोपानी बजार क्षेत्रमा ५० मिटर र कोदारीस्थित इको रिसोर्ट नजिक ५० मिटर सडक पहिरो र नदी कटानले क्षत्विक्षत भएको छ । नौ किलोको सडक माथिल्लो भोटेकोशी जलविद्युत् आयोजनाको बाँधका कारण कटान भएकाले आयोजनाले नै बनाइदिने विषयमा छलफल भइरहेको र हाम्रोतर्फबाट पनि सम्बन्धित निकायमा बजेट माग गरिएको डिभिजन सडक कार्यालय दोलखाका प्रमुख जिल्ला इञ्जिनियर अशोक तिवारीले बताउनुभयो ।

नदीबाट उठाउन करीब ३० मिटर उचाइ पर्ने र माथि बस्ती भएकाले भित्तो काट्न पनि नमिल्ने हुँदा नदीको पानी घटेपछि काम गर्न सजिलो हुने जिल्ला इञ्जिनियर तिवारीको भनाइ छ ।

बाँध स्थलको सडक माथिल्लो भोटेकोशी जलविद्युत् आयोजनाकै कारण बिग्रेको हँुदा यस अघि आयोजनाले बनाइदिएको र अब उसैले बनाउनुपर्ने भोटेकोशी गाउँपालिकाका अध्यक्ष राजकुमार पौडेलको भनाइ छ ।

सडकको अभावमा पैदल हिँड्नसमेत कठिनाइ परेको छ । खाद्यान्नलगायतका सामग्री २६ किलोमिटर तलको बाह्रबिसे बजारबाट लानुपर्ने हुँदा स्थानीयको दैनिक जीवन ज्यादै कष्टकर बनेको अध्यक्ष पौडेल थप्नुहुन्छ ।

अवरुद्ध सडक खुलाउन बजेट निकासा तुरुन्तै भए चाँडै खुलाइने र निकासा ढिला भए दशँैपछि पनि पुग्नसक्ने जिल्ला इञ्जिनियर तिवारी बताउनुहुन्छ ।

त्यस क्षेत्रमा दैनिकजसो पानी पर्ने र नेपाल–चीनको सीमा नदी भएकाले भोटेकोशी नदीको बहाबमा कमी आउन विगतको अनुभवलाई दृष्टिगत गर्दा कम्तीमा एक महिना समय लाग्ने देखिएको हुँदा अवरुद्ध सडक खुल्न भदौ महिना पुग्ने सम्भावना रहेको अध्यक्ष पौडेल बताउनुहुन्छ । रासस

प्रतिक्रिया

सम्बन्धित सामाग्री