भदौ २ र ३ गते ‘हिन्दकुश हिमालय संसदीय बैठक’ हुँदै

जलवायु परिवर्तन, वायु प्रदूषण र वातावरणलगायत विषयमा सामूहिक रुपमा छलफल गर्ने उद्देश्यले आगामी भदौ २ र ३ गते काठमाडौँमा ‘हिन्दकुश हिमालय संसदीय बैठक’ (एचकेएच बैठक) हुने भएको छ ।

प्रतिनिधिसभाको कृषि, सहकारी तथा प्राकृतिक स्रोत समितिको समन्वय र अन्तरराष्ट्रिय एकीकृत पर्वतीय विकास केन्द्र (इसिमोड)को सहयोगमा उक्त बैठक हुन लागेको हो । समितिले हिन्दुकुश हिमालय क्षेत्रमा रहेका देशहरू (नेपाल, भारत, चीन, भुटान, बङ्गलादेश, म्यानमार, पाकिस्तान र अफगानिस्तान)का जनप्रतिनिधि, संसदीय समितिका प्रमुख तथा सदस्यहरू र संसदीय व्यवस्था नरहेका देशका जलवायु क्षेत्रमा काम गर्ने उच्च पदस्थ निकायका प्रतिनिधिहरूसँग बैठक आयोजना गर्न लागेको हो ।

समितिले आज बैठकको तयारीका सम्बन्धमा सरोकारवाला मन्त्रालयका सचिव र सहसचिव तथा विज्ञहरूको सहभागितामा आवश्यक सहयोग, सहजीकरण, सुरक्षा र आपसी समन्वय लगायतका विषयमा छलफल गरेको थियो ।

छलफलमा परराष्ट्र, वन तथा वातावरण, संस्कृति, पर्यटन तथा नागरिक उड्डयन, गृह, स्वास्थ्य, रक्षा, ऊर्जा, जलस्रोत तथा सिँचाइ मन्त्रालयका सचिव तथा सहसचिवहरू र अन्य सरोकारवाला निकायका प्रतिनिधि र सम्बन्धित विज्ञहरू सहभागी हुनुहुन्थ्यो ।

एचकेएच बैठकको उद्घाटन राष्ट्रपति रामचन्द्र पौडेलले गर्नुहुने बताइएको छ । समितिका सदस्य वीरबहादुर बलायरको संयोजकत्वमा समितिमा प्रतिनिधित्व गर्ने दलहरूको सहभागितामा बैठक आयोजना गर्नेसम्बन्धी प्राविधिक समिति गठन गरिएको छ ।

आजको तयारी बैठकमा कृषि समितिका सभापति कुसुमदेवी थापाले नेपाल जलवायु परिवर्तनका असरबाट बढी प्रभावित भएको सन्दर्भमा यसका चुनौतीको सामना गर्न हिमाल भएका मुलुकसँग सहकार्य अभिवृद्धिका लागि बैठक गर्न लागिएको बताउनुभयो ।

साथै जलवायु विपद् र प्रदूषण, पर्वतीय क्षेत्र र जीवनशैली विषयमा छलफल हुने तथा यस क्षेत्रका मुलुकमा भएका जलवायु अनुकूलनसम्बन्धी राम्रा सिकाइ आदानप्रदान गरिने उहाँले बताउनुभयो । दुई दिनसम्म सञ्चालन हुने बैठकमा अधिकांश मुलुकबाट आउने प्रतिनिधिको निश्चित भइसकेको समितिले जनाएको छ ।

संयोजक बलायरले यस क्षेत्रका जलवायुका मुद्दामा सामूहिक सहकार्य बढाउने तथा अन्तरराष्ट्रिय मञ्चमा साझा धारणा सशक्त बनाउने उद्देश्यका साथ बैठक आयोजना गर्न लागेको बताउनुभयो । साथै उहाँले बैठकको उद्देश्य र तयारीबारे अवगत गराउँदै यो बैठक राष्ट्रकै गौरवको विषय भएकाले यसलाई सफल बनाउन सबैलाई आफ्नोतर्फबाट हरसम्भव प्रयास गर्न आग्रह गर्नुभयो ।

पूर्वमा म्यान्मारबाट पश्चिमको अफगानिस्तानसम्म फैलिएको तीन हजार ५०० किलोमिटर हिन्दकुश हिमालय क्षेत्रबाट पग्लने हिउँ यो क्षेत्रका १० प्रमुख नदीको पानीको स्रोत हो । यही पानीको स्रोतमा करिब दुई अर्ब जनता निर्भर छन् ।

सम्बन्धित सामाग्री

सहरी विकास मन्त्रालयको वित्तीय प्रगति ५८.६ प्रतिशत

‘कुलिङ पिरियड’ हटाउन खोजे सरकारबारे सोच्न बाध्य हुन्छौँः महामन्त्री शर्मा

सात दिनभित्र समितिका दिर्नेशनको प्रगति विवरण माग्ने निर्णय

भिजिट भिसा प्रकरणः रास्वपा र राप्रपासँग सभामुखको छलफल

कार्यकर्तालाई भ्रमित पार्ने प्रयास भयो,पछि हट्दिनँ : पूर्वराष्ट्रपति भण्डारी

‘टेस्ला’ समूहको प्रमुखमा सर्लाहीका पोखरेल नियुक्त