राष्ट्रिय स्वतन्त्र पार्टी (रास्वपा) ले काठमाडौं क्षेत्र नम्बर १ बाट रञ्जु दर्शनालाई प्रतिनिधिसभा सदस्यको प्रत्यक्ष उम्मेदवार बनाउने भएको छ ।
रञ्जु दर्शना, जो विवेकशील साझा पार्टीबाट रास्वपामा प्रवेश गरेकी थिइन्, यसअघि समानुपातिक निर्वाचनको बन्दसूचीमा समावेश भएकी थिइन् तर पार्टीले खस आर्य महिलाको क्लस्टरमा उनलाई १०औं नम्बरमा राखेपछि असन्तुष्ट बनेकी थिइन् । प्राइमरी इलेक्सनमा महिला आकांक्षीहरूमा सर्वाधिक मत प्राप्त गरेकी उनलाई बन्दसूचीमा न्याय नमिलेको भन्दै पार्टीभित्र र बाहिर व्यापक विरोध भएको थियो ।
बन्दसूचीमा संशोधन भए पनि उनको स्थान सुधार नभएपछि रञ्जुले समानुपातिकबाट नाम फिर्ता लिइन् । अन्ततः पार्टी नेतृत्वले उनलाई प्रत्यक्ष निर्वाचन क्षेत्रबाट उम्मेदवार बनाउने निर्णय गरेको हो ।
रञ्जु चाँडै आमा बन्ने तयारीमा रहेकी छन् । शारीरिक अवस्थाका कारण घरदैलो र प्रचारप्रसारमा असहज हुने भएकाले सुरुमा समानुपातिकबाट उठ्न चाहेकी उनले समानुपातिकमा जित्ने सम्भावना कम देखेपछि प्रत्यक्षमा आउन तयार भएकी हुन् । काठमाडौं-१ क्षेत्र घरदैलोका लागि तुलनात्मक रूपमा सहज छ ।
प्रतिक्रिया