४७.६९ प्रतिशतले बढ्यो एनएमबि बैंकको खुद नाफा

एनएमबि बैंक लिमिटेडले चालु आर्थिक वर्षको दोस्रो त्रैमाससम्ममा १ अर्ब ६१ करोड ३९ लाख रुपैयाँ खुद नाफा कमाएको छ।

यो गत आर्थिक वर्षको सोही अवधिको तुलनामा ५२ करोड ११ लाख रुपैयाँ अर्थात ४७.६९ प्रतिशत बढी हो। गत आर्थिक वर्षको सोही अवधिसम्ममा बैंकले १ अर्ब ९ करोड २७ लाख रुपैयाँ खुद नाफा कमाएको थियो।

बैंकको खुद ब्याज आम्दानी सामान्य बढेसँगै इम्पेरमेन्ट चार्ज रिभर्स भएपछि बैंकको नाफामा सुधार देखिएको हो। पुस मसान्तसम्ममा बैंकको २१ करोड १० लाख रुपैयाँ इम्पेरमेन्ट चार्ज रिभर्स भएको छ। सो अवधिसम्ममा बैंकको वितरण योग्य मुनाफा १ अर्ब ५० करोड ९६ लाख रुपैयाँ रहेको छ।

समीक्षा अवधिमा बैंकको खुद ब्याज आम्दानी १३ करोड ५१ लाख रुपैयाँ बढेर २ अर्ब ८६ करोड रुपैयाँ पुगेको छ। त्यसैगरी, बैंकको सञ्चालन मुनाफा ७२ करोड ४० लाख रुपैयाँ बढेर २ अर्ब २९ करोड ९३ लाख रुपैयाँ पुगेको छ।

पुस मसान्तसम्ममा १४ अर्ब ४४ करोड ७७ लाख रुपैयाँ चुक्ता पूँजी रहेको यस बैंकको जगेडा कोषमा ५ अर्ब १० करोड ९२ लाख रुपैयाँ रहेको छ भने रिटेन्ड अर्निङ्गमा ३ अर्ब ४९ करोड ७८ लाख रुपैयाँ सञ्चित छ। गत आर्थिक वर्षको अन्त्यसम्ममा बैंकको चुक्ता पूँजी १३ अर्ब ९५ करोड रुपैयाँ हुँदा जगेडा कोषमा ५ अर्ब १२ करोड ७० लाख रुपैयाँ र रिटेन्ड अर्निङ्गमा १ अर्ब ७३ करोड ७२ लाख रुपैयाँ थियो।

खुद नाफा बढेसँगै बैंकको प्रतिशेयर आम्दानी पनि बढेको छ। गत आर्थिक वर्षको पुस मसान्तसम्ममा २० रुपैयाँ ३१ पैसा रहेको बैंकको यस्तो आम्दानी, चालु आर्थिक वर्षको सोही अवधिसम्ममा बढेर २२ रुपैयाँ ५० पैसा पुगेको छ। सो अवधिसम्ममा बैंकको प्रतिशेयर नेटवर्थ १६० रुपैयाँ ४१ पैसा रहेको छ भने मूल्य आम्दानी अनुपात १९.७३ गुणा रहेको छ।

पछिल्लो ६ महिनामा बैंकको निक्षेप १ खर्ब ३१ अर्ब ६६ करोड रुपैयाँबाट बढेर १ खर्ब ४२ अर्ब ५६ करोड रुपैयाँ पुगेको छ। त्यसैगरी, बैंकको कर्जा लगानी १ खर्ब १५ अर्ब ६६ करोड रुपैयाँबाट बढेर १ खर्ब ३७ अर्ब २९ करोड रुपैयाँ पुगेको छ।

कर्जा लगानी बढाएसँगै बैंकको निष्क्रिय कर्जा पनि बढेको छ। गत आर्थिक वर्षको पुस मसान्तसम्ममा १.९६ प्रतिशत रहेको बैंकको निष्क्रिय कर्जा चालु आर्थिक वर्षको सोही अवधिसम्ममा सामान्य बढेर २.३८ प्रतिशत पुगेको छ।

समीक्षा अवधिमा बैंकको आधार दर १०.१२ प्रतिशतबाट ७.४० प्रतिशतमा झरेको छ। त्यसैगरी, बैंकको स्प्रेड दर ५.०३ प्रतिशतबाट ४.०२ प्रतिशतमा झरेको छ।

सम्बन्धित सामाग्री