नाडा अटो शोमा बैंकहरूको आकर्षक अटो लोन योजना, सवारीसाधन खरिद गर्न चाहनेहरूका लागि अवसर
काठमाडौंको भृकुटीमण्डपमा मंगलबारदेखि सुरु भएको १७औँ नाडा अटो शोमा आठ वटा वाणिज्य बैंकहरूले सहभागिता जनाएका छन्। यी बैंकहरूले नाडा अटो शोलाई लक्षित गरी आकर्षक अटो लोन योजनाहरू सार्वजनिक गरेका छन्। सहभागी बैंकहरूले आधारदरमा न्यूनतम ६.२३ देखि ८.१५ प्रतिशतसम्म ब्याजदरमा फिक्स्ड र फ्लोटिङ दरमा अटो लोन प्रदान गर्ने घोषणा गरेका छन्।
नबिल बैंकले आधारदर ५.७४ प्रतिशतमा १ प्रतिशत प्रिमियम थपेर ६.७४ प्रतिशत ब्याजदरमा विद्युतीय सवारी (ईभी) खरिदका लागि अटो लोन प्रदान गर्ने भएको छ। यो ऋण ५ देखि ७ वर्षको अवधिका लागि उपलब्ध हुनेछ।
हिमालयन बैंकले ईभी खरिदका लागि ७.५ प्रतिशत ब्याजदरमा र डिजेल गाडीका लागि ७.६५ प्रतिशत ब्याजदरमा ८ वर्षको अवधिका लागि अटो लोन दिने भएको छ।
एनएमबी बैंकले नाडा अटो शोका लागि विशेष अटो लोन योजना ल्याएको छ। यो योजनाअन्तर्गत ७ वर्षको अवधिका लागि फिक्स्ड ब्याजदरमा ८.८९ प्रतिशत र फ्लोटिङ दरमा ७.५ प्रतिशत ब्याजदर निर्धारण गरिएको छ। बैंकले आवेदन प्रक्रियालाई सहज र लचिलो बनाएको जनाएको छ।
लक्ष्मी सनराइज बैंकले आधारदरमा १ प्रतिशत प्रिमियम थपेर फ्लोटिङ दरमा ७.३५ प्रतिशत र फिक्स्ड दरमा ७.९९ प्रतिशत ब्याजदरमा ७ वर्षको अवधिका लागि अटो लोन प्रदान गर्ने भएको छ।
ग्लोबल आइएमई बैंकले फ्लोटिङ दरमा ६.९९ प्रतिशत र फिक्स्ड दरमा ८.२५ प्रतिशत ब्याजदरमा अटो लोन दिने भएको छ।
कृषि विकास बैंकले सबैभन्दा कम ६.२३ प्रतिशत ब्याजदरमा ईभी लोन योजना ल्याएको छ। नाडा अवधिभर सेवा शुल्कमा ३३ प्रतिशत छुटको व्यवस्था गरिएको छ। यो बैंकले नाडा अटो शोमा सबैभन्दा सस्तो ब्याजदरमा अटो लोन प्रदान गर्ने भएको छ।
सानिमा बैंकले ५ वर्षका लागि ७.९९ प्रतिशत र ७ वर्षका लागि ८.१५ प्रतिशत ब्याजदरमा अटो लोन दिने जनाएको छ।
नेपाल एसबीआई बैंकले आधारदरमा ०.७० प्रतिशत प्रिमियम थपेर अटो लोन दिने भएको छ। गत असारसम्म बैंकको आधारदर ६.२९ प्रतिशत रहेको थियो, तर यो आधारदर अझ घट्ने सम्भावना रहेको बैंकले जनाएको छ।
नेपाल राष्ट्र बैंकले ईभी खरिदका लागि ऋण सीमा ६० प्रतिशतमा झारेको छ। यसअनुसार ईभी किन्ने व्यक्तिले ४० प्रतिशत डाउन पेमेन्ट गर्नुपर्नेछ। गत जेठसम्म बैंक तथा वित्तीय संस्थाहरूले हायरपर्चेज लोनमार्फत १ खर्ब ३० अर्ब ९४ करोड ८० लाख रुपैयाँ लगानी गरेको तथ्यांक छ। जसमा संस्थागततर्फ ८७ अर्ब २६ करोड र व्यक्तिगततर्फ ३६ अर्ब ४७ करोड रुपैयाँ ऋण प्रवाह भएको छ।
नाडा अटो शो २०२५ मा सहभागी बैंकहरूले ग्राहकलाई आकर्षित गर्न प्रतिस्पर्धी ब्याजदर र सुविधाजनक योजनाहरू ल्याएका छन्। यो शोले सवारीसाधन खरिद गर्न चाहनेहरूका लागि उत्कृष्ट अवसर प्रदान गरेको छ।
सम्बन्धित सामाग्री
सम्पर्क
बागबजार,काठमाडौंफोन: ०१-५३४५३०४
ईमेल: samayapost@gmail.com
विज्ञापनको लागि: ९८४९०६५१२६, ९८५११२८४७०
सूचना विभाग दर्ता नंं: १९९/७३-७४
प्रतिक्रिया