चुक्ता पुँजी बढाउन स्टान्डर्ड चार्टर्ड बैंकले एफपीओ जारी गर्ने
काठमाडौं । स्टान्डर्ड चार्टर्ड बैंकले चुक्ता पुँजी बढाउन एफपीओ जारी गर्ने भएको छ ।
बैंकले हालैमात्र बैंकको वेभसाइड मार्फत पुँजी वृद्धि सम्बन्धी योजना सार्वजानिक गर्दै यसै आर्थिक वर्षमा ३ अर्ब ३० करोड रुपैयाँ बराबरका फरदर पब्लिक अफरिङ (एफपीओ) जारी गर्ने जानकारी दिएको हो ।
बैंकले सार्वजानिक गरेको योजना अनुसार प्रिमियम मुल्यमा ३ अर्ब ३० करोड रुपैयाँ बराबरको एफपीओ जारी गर्ने उल्लेख छ ।
बैंकले जारी गर्ने प्रिमियम मुल्य जोड्दा एफपीओ मार्फत २० देखि ३० अर्ब रुपैयाँ संकलन गर्ने देखिन्छ ।
हाल बैंकको चुक्ता पुँजी २ अर्ब ८१ करोड रुपैयाँ छ ।
गत आर्थिक वर्षको नाफाबाट बैंकले ३३ प्रतिशत बोनस सेयर दिने घोषणा गरिसकेको छ । बोनस सेयर वितरण गरेपछि बैंकको चुक्ता पुँजी ३ अर्ब ७५ करोड हुनेछ ।
एफपीओ र बोनस सेयर वितरण पछि पुँजी बैंकको चुक्ता पुँजी ७ अर्ब ५ करोड पुग्नेछ । बैंकले जारी गर्ने यो एफपीओ हाल सम्मकै सबैभन्दा ठूलो एफपीओ हुनेछ ।
त्यसैगरी बैंकले चालू आर्थिक वर्षको नाफाबाट आगामी आर्थिक वर्षमा १ अर्ब रुपैयाँ बराबरको बोनस सेयर दिने पुँजी वृद्धि योजनामा उल्लेख छ ।
चालू आवको बोनस सेयरपछि बैंकको चुक्ता पुँजी ८ अर्ब ५ करोड रुपैयाँ पुग्नेछ ।
०७२ साउन पहिलो साता सार्वजानिक गरिएको मौद्रिक नीतिमार्फत राष्ट्र बैंकले ०७४ असार मसान्त सम्ममा वाणिज्य बैंकहरुको न्यूनतम चुक्ता पुँजी ८ अर्ब रुपैयाँ हुनुपर्ने व्यवस्था गरेको थियो ।
राष्ट्र बैंकले ०७२ भदौ मै वाणिज्य बैंकहरुलाई पुँजी वृद्धि योजना सार्वजानिक गर्न निर्देशन समेत दिएको थियो ।
सबै बैंक तथा वित्तीय संस्थाहरुले तोकिएको समयमै पुँजी वृद्धि योजना सार्वजानिक गरिसकेका छन् ।
राष्ट्र बैंकले तोकेको समयावधि भन्दा १३ महिनापछि स्टान्डर्ड चार्टर्ड बैंकले पुँजी वृद्धि योजना सार्वजानिक गरेको हो ।
प्रतिक्रिया