१० महिनामा वाणिज्य बैँकहरुले कमाए ४७ अर्ब ७९ करोड नाफा
चालू आर्थिक वर्ष २०८१/८२ को पहिलो १० महिनामा वाणिज्य बैंकहरूको कुल नाफामा सामान्य गिरावट देखिएको छ। नेपाल राष्ट्र बैंकको तथ्याङ्क अनुसार, आर्थिक वर्षको वैशाख मसान्तसम्म २० वटा वाणिज्य बैंकहरूले कूल ४७ अर्ब ७९ करोड ४७ लाख रुपैयाँ खुद नाफा आर्जन गरेका छन्।
यो अघिल्लो वर्षको सोही अवधिको तुलनामा करिब ८१ करोड रुपैयाँले कम हो । जसले गर्दा १.६७ प्रतिशतको गिरावट देखिएको हो।
यो अवधिमा १० बैँकको नाफा बढेको छ भने १० बैँकको घटेको छ । नाफा वृद्धि हुने बैँकहरुमा नेपाल बैँक, नेपाल इन्भेष्टमेन्ट मेगा, एभरेष्ट, ग्लोबल आईएमई, माछापुच्छ्रे, लक्ष्मी सनराइज, सानिमा, एनएमबि, नबिल र सिद्धार्थ बैँक रहेका छन् । त्यस्तै, नाफा घट्ने बैँकहरुमा एनआईसी एसिया, हिमालयन, कुमारी, कृषि विकास, राष्ट्रिय वाणिज्य, सिटिजन, प्रभु, प्राइम, स्ट्यान्डर्ड चार्टर्ड र नेपाल एसबीआई बैँक छन् ।
नाफा कमाउने पाँच बैँक
नबिल बैँकले१० महिनाको अवधिमा ५ अर्ब ६० करोड ३९ लाख रुपैयाँ खुद नाफा कमाएको छ । गत वर्ष यही अवधिमा बैँकको नाफा ५ अर्ब ४६ करोड २५ लाख रुपैयाँ थियो ।
ग्लोबल आईएमई बैँकले यस अवधिमा ५ अर्ब ३५ करोड ५४ लाख रुपैयाँ नाफा आर्जन गरेको छ, जुन गत वर्षको ४ अर्ब १२ करोड २९ लाखको तुलनामा २९.८९ प्रतिशतको वृद्धि हो ।
तेस्रो स्थानमा रहेको नेपाल इन्भेष्टमेन्ट मेगा बैँक (एनआईएमबी) ले पनि उत्कृष्ट प्रदर्शन गर्दै ५ अर्ब २ करोड ८ लाख रुपैयाँ नाफा कमाएको छ । गत वर्ष बैँकको नाफा ३ अर्ब ७७ करोड १० लाख रुपैयाँ थियो । यो वर्षको वृद्धि करिब ३३ प्रतिशतको हो । यस अनुसार शीर्ष तीन बैँकले मात्रै कुल नाफाको ३३ प्रतिशतभन्दा बढी हिस्सा ओगटेका छन् ।
त्यस्तै, एभरेष्ट बैँक ३ अर्ब ९० करोड ३३ लाख रुपैयाँ नाफासहित धेरै नाफा कमाउने चौथो बैँक बनेको छ । नाफा कमाउने क्लबमा प्रवेश गर्ने तयारीमा छ । पाँचौ स्थानमा रहेको नेपाल बैँक लिमिटेड (एनबीएल) ले भने सबैलाई चकित पार्दै ३ अर्ब २८ करोड ७७ लाख रुपैयाँ नाफा आर्जन गरेको छ ।
सरकारी स्वामित्वको नेपाल बैँकले गत वर्षको १० महिनामा केवल ५९ करोड ३ लाख रुपैयाँ नाफा कमाएको यो बैँकले यस वर्ष सोही अवधिमा ४५४ प्रतिशत वृद्धि गरेर नाफा ३ अर्ब २८ करोड ७७ लाख रुपैयाँ नाफा पुर्याएको छ । योसँगै बैँक धेरै नाफा कमाउने पाँचौँ बैँक समेत बनेको छ । यसैगरी, ग्लोबल आईएमई बैँकले १ अर्ब २३ करोड र एनआईएमबीले १ अर्ब २५ करोड रुपैयाँले आफ्नो नाफा बढाएका छन् । एभरेष्ट बैंकले पनि आफ्नो नाफामा करिब ९२ करोड रुपैयाँ थपेको छ ।
एनआईसी एसिया बैँकले गत वर्षको १० महिनामा २ अर्ब १६ करोड ३२ लाख रुपैयाँ नाफा कमाएको थियो । बैँकको नाफा यस वर्ष घटेर केवल ४७ करोड ८६ लाख रुपैयाँमा सीमित भएको छ । बैंकको नाफामा करिब १ अर्ब ६८ करोड रुपैयाँ अर्थात् ७७.८७ प्रतिशत गिरावट आएको हो ।
त्यस्तै, हिमालयन बैँकले गत वर्ष २ अर्ब २२ करोड ९८ लाख रुपैयाँ नाफा कमाएको थियो । यस वर्ष ६९ प्रतिशतले गुमाउँदै मात्र ६८ करोड ३४ लाख रुपैयाँ आर्जन गरेको छ ।
कुमारी बैँकको नाफा १ अर्ब ४२ करोडबाट घटेर ४८ करोड १९ लाखमा झरेको छ । कृषि विकास बैँक र राष्ट्रिय वाणिज्य बैँक जस्ता सरकारी स्वामित्वका बैँकको नाफामा पनि क्रमशः ९६ करोड र ७९ करोड रुपैयाँको गिरावट आएको देखिन्छ ।
सम्बन्धित सामाग्री
सम्पर्क
बागबजार,काठमाडौंफोन: ०१-५३४५३०४
ईमेल: samayapost@gmail.com
विज्ञापनको लागि: ९८४९०६५१२६, ९८५११२८४७०
सूचना विभाग दर्ता नंं: १९९/७३-७४
प्रतिक्रिया