भारतीय दूतावासमा २३ औं स्वर्ण जयन्ती छात्रवृत्ति दिवस सम्पन्न
काठमाडौंस्थित भारतीय राजदूतावासमा आज २३ औं स्वर्ण जयन्ती छात्रवृत्ति दिवस मनाइएको छ ।
उक्त समारोहमा छात्रवृत्तिबाट समर्थित करिब २०० विद्यार्थीहरूको सहभागिता रहेको थियो।
कार्यक्रममा विश्वविद्यालय अनुदान आयोग नेपालका अध्यक्ष डा. देवराज अधिकारी, काठमाडौं विश्वविद्यालयका उपकुलपति डा. अच्युत वाग्ले, राजर्षि जनक विश्वविद्यालयका उपकुलपति डा. अमरप्रसाद यादव, पूर्वाञ्चल विश्वविद्यालयका उपकुलपति डा. बिजु कुमार थपलिया, मध्यपश्चिम विश्वविद्यालयका उपकुलपति डा. ध्रुव कुमार गौतम, वी.पी. कोइराला स्वास्थ्य विज्ञान प्रतिष्ठानका उपकुलपति डा. ज्ञानेन्द्र गिरी र कृषि तथा वन विज्ञान विश्वविद्यालयका उपकुलपति डा. शारदा थपलियाको उपस्थिति रहेको थियो। साथै, विभिन्न शैक्षिक संस्थानका डीनहरू र प्रख्यात विद्यालयका प्रधानाध्यापकहरूले पनि कार्यक्रममा भाग लिएका थिए।
नेपालका लागि भारतीय राजदूत नवीन श्रीवास्तवले स्वर्ण जयन्ती छात्रवृत्तिको दोस्रो ब्याचका मेधावी विद्यार्थीहरूलाई “राजदूतको स्वर्ण जयन्ती छात्रवृत्ति रोल अफ अनर” प्रदान गर्नुभयो।
राजदूत श्रीवास्तवले २३ औं ब्याचका पुरस्कृत विद्यार्थीहरू र रोल अफ अनर प्राप्त मेधावीहरूलाई बधाई दिँदै आफ्नो क्षेत्रमा उत्कृष्टता हासिल गर्न प्रोत्साहन गर्नुभयो। उहाँले भारतको स्टार्टअप इकोसिस्टम, इन्क्युबेशन सेन्टरहरू र सहकार्यका पहलहरूबाट उपलब्ध अवसरहरूबारे पनि प्रकाश पार्नुभयो।
भारत-नेपाल आर्थिक सहयोगको ५० वर्ष पूरा भएको स्मरणमा सन् २००२ मा स्थापना भएको स्वर्ण जयन्ती छात्रवृत्ति योजनाले हालसम्म वार्षिक २०० विद्यार्थीलाई लाभ पुर्याउँदै आएको छ। यो योजनाबाट नेपालका ७७ वटै जिल्लाका ३५०० भन्दा बढी विद्यार्थीहरू लाभान्वित भएका छन्। यस वर्षको ब्याचमा ७५ जिल्लाका विद्यार्थीहरू समावेश छन्, जसमध्ये एक तिहाइ छात्राहरू र ३ जना भिन्न क्षमता भएका विद्यार्थीहरू पनि छनोट भएका छन्।
भारत सरकारले प्रत्येक वर्ष इन्जिनियरिङ, चिकित्सा, दन्त चिकित्सा, व्यवस्थापन, वाणिज्य, नर्सिङ, आयुर्वेद, नृत्य, रंगमञ्च र प्रदर्शन कला जस्ता क्षेत्रमा नेपाली विद्यार्थीहरूलाई करिब १,५०० छात्रवृत्ति प्रदान गर्दै आएको छ। यी छात्रवृत्तिहरूले भारतका शैक्षिक संस्थानहरूमा पहुँच सुनिश्चित गर्नुका साथै नेपालमा स्नातक, स्नातकोत्तर र विद्यावारिधि तहको अध्ययनमा सहयोग पुर्याउँछन्। सन् २००१ यता भारत सरकारका विभिन्न छात्रवृत्ति पहलहरूबाट करिब ४०,००० नेपाली विद्यार्थीहरू लाभान्वित भएका छन्।
भारत र नेपालबीचको शैक्षिक सहयोग, क्षमता निर्माण र साझेदारीले दुई देशबीचको मित्रतालाई थप मजबुत बनाउँदै जनता-जनताबीचको सम्बन्धलाई प्रगाढ बनाएको छ। यस्ता छात्रवृत्ति र क्षमता निर्माणका पहलहरूले नेपालको मानव संसाधन विकास र समृद्धिमा भारतको साझेदारीलाई बलियो बनाएको छ।
सम्बन्धित सामाग्री
सम्पर्क
बागबजार,काठमाडौंफोन: ०१-५३४५३०४
ईमेल: samayapost@gmail.com
विज्ञापनको लागि: ९८४९०६५१२६, ९८५११२८४७०
सूचना विभाग दर्ता नंं: १९९/७३-७४
प्रतिक्रिया