राष्ट्रियसभामा अन्तिम चरणमा पुगेका विधेयक प्रतिनिधिसभा नहुँदा निस्क्रिय हुने अवस्थामा पुगेका कतिपय कानुन निर्माणका अवरोध हटाउनेतर्फ ध्यान दिनुपर्ने सुझाव राष्ट्रियसभाबाट बिदाइ हुन लागेका सदस्यहरूले दिनुभएको छ ।
राष्ट्रियसभाको आजको बैठकमा समयावधि पुगेका सांसदले बिदाइसहित सभाको अनुभव साट्ने क्रममा कानुन निर्माणका अवरोध हटाउनुपर्ने सुझाव दिनुभएको हो । सांसद देवेन्द्र दाहालले सभालाई विज्ञहरूको सभा बनाउनुपर्ने सुझाव दिनुभयो ।
विज्ञ र बौद्धिक सदस्य छनोट गरेर राजनीतिक दलले सभामा पठाउनुपर्ने धारणा उहाँले राख्नुभएको थियो । संवैधानिक व्यवस्थाबमोजिम छ वर्ष पदावधि पूरा गरी एक तिहाइ सभा सदस्य आगामी फागुन २० गतेदेखि बिदाइ हुन लाग्नुभएको हो ।
आगामी फागुन २१ गते १९ जना सभासदस्यको पदावधि समय सकिँदैछ । संसदीय अभ्यासका क्रममा प्राप्त अनुभव साझा गर्ने क्रममा सदस्य गङ्गाकुमारी बेल्वासेले समितिले विभिन्न आवश्यक महत्वका कानुन सम्पादन कार्य भइरहेको र यस क्रममा थुप्रै काम सिक्ने अवसर मिलेको बताउनुभयो । राष्ट्रियसभामा रहेका विधेयकहरू प्रतिनिधिसभा विघटन हुँदा निस्क्रिय हुने अवस्थामा पुगेका भन्दै यो अवस्था उचित नरहेको उहाँले बताउनुभयो । “ठूलो मेहनत र स्रोत लगानी गरेर बनेका विधेयक अन्तिम समयमा निस्क्रय हुनु राम्रो होइन”, उहाँले भन्नुभयो, “निजामती विधेयक, शिक्षा विधेयक महत्वपूर्ण विधेयक निस्क्रिय हुँदा चिन्ता लागेको छ ।” सदस्य तुलसीकुमारी दाहालले सङ्घीय सरकारको दुई सदन समान रूपले महत्वपूर्ण छन् भन्ने बुझाउन नसकिएको बताउनुभयो ।
उहाँले जनताको जीवनस्तरमा अझै पनि सुधार गर्न नसकिएकामा आत्मसमीक्षा गर्नुभयो । सभा सदस्य गोपाल भट्टराईले राष्ट्रियसभामा बनेका कानुनलाई विभिन्न कारणले निस्क्रिय बनाउने अवस्था हटाएर कानुनी निर्माणका अवरोधमाथि समीक्षा गर्नुपर्ने बताउनुभयो ।
प्रतिक्रिया