ङादी ग्रुप पावर लिमिटेडले आज (पुस २३ गते) देखि हकप्रद शेयर निष्काशन तथा बिक्री खुला गरेको छ। कम्पनीले हाल कायम चुक्ता पूँजीको शतप्रतिशत अनुपातमा हकप्रद शेयर निष्काशन गर्न लागेको हो। यसअन्तर्गत, १ कित्ता शेयर बराबर नयाँ १ कित्ता हकप्रद शेयर निष्काशन हुनेछ। यस प्रक्रियाअन्तर्गत, प्रतिशेयर १०० रुपैयाँ अंकित मूल्यका १ करोड ८५ लाख १२ हजार ७१२.२२५ कित्ता हकप्रद शेयर निष्काशन हुँदैछ, जसको कुल मूल्य १ अर्ब ८५ करोड १२ लाख ७९ हजार २२२ रुपैयाँ ५० पैसा रहेको छ।
हकप्रद शेयरको लागि कम्पनीले मंसिर १८ गते बुकक्लोज गरिसकेको छ। मंसिर १७ गतेसम्म नेप्सेमा कारोबार गरी कायम भएका शेयरधनीहरूले यो हकप्रद शेयरमा आवेदन दिन सक्नेछन्। आवेदन दिने समय पुस २३ गतेबाट माघ १४ गतेसम्म तोकिएको छ।
हकप्रद शेयर निष्काशनका लागि गराइएको रेटिङ्गमा केयर रेटिङ्ग नेपालले कम्पनीलाई केयरएनपि डबल बी प्लस इस्यूअर रेटिङ्ग प्रदान गरेको छ। यो रेटिङ्गले कम्पनीले समयमा वित्तीय दायित्व बहन गर्ने क्षमतामा मध्यम जोखिम रहेको संकेत गर्दछ।
कम्पनीको शेयर निष्काशन तथा बिक्री प्रबन्धक सिद्धार्थ क्यापिटल लिमिटेड रहेको छ। लगानीकर्ताले सिद्धार्थ बैंकका विराटनगर, वीरगञ्ज, नारायणघाट, पोखरा, बुटवल, नेपालगञ्ज, धनगढी र सुर्खेत शाखा कार्यालयबाट आवेदन दिन सक्नेछन्। साथै, नेपाल धितोपत्र बोर्डबाट अनुमति प्राप्त आस्वा सेवामा सहभागी बैंक तथा वित्तीय संस्थाका शाखाहरूबाट र ‘मेरो शेयर’ अनलाइन सफ्टवेयरमार्फत पनि आवेदन दिन सकिनेछ।
हाल कम्पनीको चुक्ता पूँजी १ अर्ब ८५ करोड १२ लाख ७९ हजार २२२ रुपैयाँ ५० पैसा रहेको छ। हकप्रद शेयर निष्काशन तथा बाँडफाँटपछि यो रकम ३ अर्ब ७० करोड २५ लाख ५८ हजार ४४५ रुपैयाँ पुग्नेछ। हकप्रद शेयरबाट संकलित रकममध्ये १ अर्ब ८१ करोड ८७ लाख ७९ हजार २२२ रुपैयाँ ५० पैसा बझाङ्ग माथिल्लो सेती जलविद्युत आयोजना निर्माणमा लगानी गरिनेछ भने ३ करोड २५ लाख रुपैयाँ मर्मत संभार कार्यमा खर्च गरिनेछ।
ङादी ग्रुप पावर लिमिटेडको हकप्रद शेयरमा लगानी गर्न इच्छुक लगानीकर्ताले समयमा आवेदन दिएर यस अवसरको फाइदा लिन सक्नेछन्।
प्रतिक्रिया