बुधबार, २१ जेठ २०७७

पिपिई सेट नहुँदा जोखिम मोलेरै काम गर्दै चिकित्सक

समयपोष्ट २०७६ चैत १२ गते ११:४९

विमलबहादुर विष्ट

कोरोना भाइरसको रोकथामका लागि डोटी जिल्लामा बिभिन्न प्रयास भइरहे पनि उक्त सङ्क्रमण भएका बिरामीलाइ जाँच गर्दा चिकित्सकले प्रयोग गर्ने पिपिई(पर्सनल प्रोटेक्टिभ इक्विपमेण्ट) सेट अभावका कारण चिकित्सकलाई समस्या हुने भएको छ । कोभिड–१९ को सङ्क्रमण भएका बिरामीलाइ राख्नका लागि जिल्लामा आइसोलेशन कक्ष तथा शय्या तयारी अवस्थामा भए पनि यहाँका चिकित्सकले पिपिई सेट र एन ९५(कीटाणु पस्न नसक्ने) मास्क अहिलेसम्म पाउन सकेका छैनन् ।

पिपिई सेट र मास्क नपाउँदा चिकित्सक जोखिम मोलेरै अस्पतालमा बिरामी जाँच गर्न बाध्य भएको सुदूरपश्चिम क्षेत्रीय प्रहरी अस्पताल दिपायलका डा बबिता गजमेरले बताउनुभयो । उहाँले भन्नुभयो, “अस्पालहरुमा पिपिई सेट छैन, सङ्क्रमितको सङ्ख्या बढ्यो भने के गर्ने भन्ने समस्या छ ।”

सरकारले सबै स्वास्थ्यकर्मी सुरक्षित छन् भनिरहे पनि स्वास्थ्यकर्मी पिपिई सेट नहुँदा दिनहुँ जोखिम मोल्दै काम गर्न विवश रहेको शैलेश्वरी अस्पतालका चिकित्सक आइजङ्ग कुँवरले बताउनुभयो । उहाँले भन्नुभयो, “उपचार गर्ने चिकित्सक नै असुरक्षित भएपछि बिरामी कसरी सुरक्षित रहने, सबैभन्दा पहिले स्वास्थ्यकर्मीलाइ पिपिई सेट उपलब्ध गराउनु जरुरी छ ।”

सरकारले जिल्ला अस्पताल डोटीमा मात्रै जम्मा पाँच थान पिपिई उपलब्ध गराएको छ । जिल्लामा रहेका अन्य निजी क्षेत्रका अस्पताल तथा सरकारी स्वास्थ्य संस्थामा पिपिई सेट नभएको चोपडा अस्पताल दिपायलका निर्देशक हिक्मतसिंह चोपडाले बताउनुभयो । उहाँले भन्नुभयो, “बिरामी जति सबै निजी अस्पतालमा छन्, ती अस्पतालका चिकित्सकले पिपिई सेटविना नै जाँच गरिरहेका छन्, बिरामीभन्दा पनि चिकित्सकलाइ बढी जोखिम छ ।”

यहाँका अस्पतालमा कार्यरत स्वास्थ्यकर्मीले पिपिई सेटविना नै दिनरात जोखिम मोल्दै बिरामी जाँचसहित ज्वरो नापिरहेको शैलेश्वरी अस्पतालका चिकित्सक लोकेन्द्र बोहराले बताउनुभयो । त्यस्तै स्थानीय स्वास्थ्य संस्थामा खटिने स्वास्थ्यका कर्मचारीदेखि जिल्लासम्मका स्वास्थ्यकर्मी जोखिम मोल्न बाध्य छन् ।

यहाँका अस्पतालमा बिरामीको उपचारमा खटिने स्वास्थ्यकर्मीसँग एन ९५ मास्क पनि नभएको बताइएको छ । त्यस्तै बिरामीको उपचारका लागि पर्याप्त स्वास्थ्य उपकरण नहुँदा स्वास्थ्यकर्मीलाई झनै समस्या हुँदै आएको जिल्ला अस्पताल डोटीका निमित्त मेडिकल सुपरिटेण्डेण्ट डा ज्योति पाण्डेले बताउनुभयो । उहाँले भन्नुभयो, “उपचारमा खटिने चिकित्सकका लागि न त पिपिई सेट छ न त पर्याप्त स्वास्थ्य उपकरण कसरी स्वास्थ्यकर्मीले बिरामीको उपचार गर्ने, ज्यानै धरापमा राख्नु पर्ने अवस्था आएको छ ।” बिरामीको जाँचमा खटिने स्वास्थ्यकर्मीका लागि पिपिई सेट प्रदेश सरकारसँग माग गरिए पनि अहिलेसम्म उपलब्ध नभएको सुदूरपश्चिम क्षेत्रीय प्रहरी अस्पताल दिपायलका डा गजमेरले गुनासो गर्नुभयो । उहाँले भन्नुभयो, “बिरामीको जाँचका लागि खटिनू भन्ने खबर आउँछ , पिपिई सेट र उपकरण माग गर्दा केही उत्तर आउँदैन, विनासामग्री कसरी उपचार गर्न खटिनू, हामीलाइ नि ज्यानको माया छ ।”

कोभिड–१९ को सङ्क्रमण भएका बिरामीलाइ उपचार तथा जाँच गरिसकेपछि पिपिई सेट जलाउनुपर्ने भएकाले एउटा चिकित्सकलाई कम्तीमा पनि तीनदेखि चार जोर पिपिई सेट आवश्यक पर्ने डा गजमेरले जानकारी दिनुभयो ।

सरकारले पिपिई सेट उपलब्ध नगराएका कारण यहाँका ग्रामीण क्षेत्रका स्वास्थ्य संस्थामा काम गर्ने चिकित्सकले हिजोआज सामान्य ज्वरो, रुघाखोकी लागेका बिरामीको जाँच गर्नसमेत आनाकानी गर्न थालेको स्थानीयवासी बताउँछन् । सरकारले पिपिई सेट, एन ९५ मास्क र अन्य उपकरण उपलब्ध गराउन नसकेका कारण चिकित्सक बिरामी जाँच गर्न डराउन थालेको जोरायल गाउँपालिकाका स्वास्थ्य संयोजक गोविन्द विष्टले बताउनुभयो । उहाँले भन्नुभयो, “हामीसंँग स्वास्थ्य उपकरण नहुँदा जोखिम मोलेर जाँच गर्न बाध्य छौंँ, हामीलाई नै समस्या भए जिम्मेवार को हुने ?”

जिल्ला अस्पतालमा आइसोलेशन वार्ड

कोभिड –१९ को सङ्क्रमणबाट स्थानीयवासीलाई बचाउन जिल्ला अस्पताल डोटीले २५ शय्याको आइसोलेशन वार्डको व्यवस्था गरेको छ । दिपायल सिलगढी नगरपालिका वडा नं ६ स्थित सिलगढीमा रहेका दुई भवनलाई प्रयोग गरी अस्पतालले नयाँ कक्ष स्थापना गरेको अस्पताल व्यवस्थापन समितिका अध्यक्ष यज्ञराज जोशीले बताउनुभयो ।

उहाँले भन्नुभयो, “तत्कालका लागि हामीले २५ शय्याको आइसोलेशन वार्ड व्यवस्था गरेका छौँ, थप आवश्यक परे दिपायल राजपुरमा रहेको सभाहलसमेत प्रयोग गर्ने गरी तयारी गर्दै छौँ ।” जिल्ला अस्पतालले व्यवस्था गरेको उक्त वार्डमा सुविधासम्पन्न सघन उपचार कक्ष, भ्यान्टिलेटरसहितको कक्ष र आइसोलेशन वार्डको व्यवस्था गरिएको अध्यक्ष जोशीले राष्ट्रिय समाचार समितिलाई जानकारी दिनुभयो ।
त्यस्तै जिल्ला अस्पतालले अस्पतालका निमित्त मेडिकल सुपरिटेण्डेण्ट डा ज्योति पाण्डेको नेतृत्वमा कोरोना प्रभावितको उपचारका लागि नौ सदस्यीय चिकित्सकको उपचार टोलीसमेत तयारी अवस्थामा राखेको जनाइएको छ ।

अस्पतालले जिल्लाका नौ वटै स्वास्थ्यचौकीमा आउने मौसमी बिरामीलगायतको उपचारका लागि बिदाका दिन पनि स्वास्थ्यकर्मी परिचालन गर्ने निर्णय गरेको छ ।
जिल्ला अस्पतालले खोलेको उक्त आइसोलेशन वार्डसहित अन्य उपचार गर्ने स्वास्थ्य केन्द्रलाई आवश्यकतानुसारका स्वास्थ्य सामग्री दिपायल सिलगढी नगरपालिकाले उपलब्ध गराइएको नगर प्रमुख मञ्जु मलासीले बताउनुभयो ।रासस

प्रतिक्रिया