सिद्धार्थ बैंक नेपाल प्रिमियर लिग (एनपीएल) को लिग चरणको अन्तिम दिन ठूलो उलटफेर भएको छ । लगातार छ खेल जितेर अपराजित रहेको सुदूरपश्चिम रोयल्सलाई विराटनगर किंग्सले ६ विकेटले हराउँदै पहिलो क्वालिफायरमा स्थान पक्का गरेको छ । यो हारसँगै सुदूरपश्चिमको अपराजित यात्रामा पूर्णविराम लागेको छ भने विराटनगर नेट रनरेटका आधारमा काठमाडौँलाई पछि पार्दै दोस्रो स्थानमा उक्लिएको छ ।
त्रिवि मैदानमा टस हारेर पहिले ब्याटिङ गरेको सुदूरपश्चिमले २० ओभरमा ६ विकेट गुमाएर १४७ रन मात्र बनाउन सक्यो । आशिफ शेखले ३२ बलमा ४५, इशान पाण्डेले ३५ बलमा ३८ र जस ब्राउनले २५ बलमा २४ रन जोडे । विराटनगरका सन्दीप लामिछानेले चार ओभरमा २० रन खर्चेर तीन विकेट लिए भने प्रतिश जिसीले दुई र बसिर अहमदले एक विकेट हात पारे ।
१४८ रनको लक्ष्य विराटनगरले ऐतिहासिक रूपमा मात्र ११.५ ओभरमै चार विकेट गुमाएर पूरा गर्यो । ओपनर फाफ डु प्लेसिस र साम हेजलेटले पहिलो विकेटका लागि ७.१ ओभरमा ९७ रनको विस्फोटक साझेदारी गरे । फाफले २० बलमा ५ चौका र ४ छक्कासहित ५० तथा सामले २७ बलमा ३ चौका र ४ छक्कासहित ५१ रन बनाए । पावरप्लेमा नै विकेट नगुमाई ८७ रन जोडेर विराटनगरले एनपीएलकै नयाँ कीर्तिमान बनायो । मार्टिन गप्टिल २२ र बसिर अहमद ८ रनमा आउट भए भने प्रतिश जिसी १३ र लोकेश बम ३ रनमा अविजित रहे । सुदूरपश्चिमका अविनास बोहराले दुई र हरमित सिंहले एक विकेट लिए ।
यो नतिजासँगै प्लेअफको समीकरण पूरा भएको छ । १२ अंकसहित सुदूरपश्चिम पहिलो र १० अंकसहित विराटनगर दोस्रो स्थानमा रह्यो । मंगलबार यी दुई टोलीबीच पहिलो क्वालिफायर हुनेछ जसको विजेता सिधै फाइनल पुग्नेछ भने पराजित टोलीले दोस्रो मौका पाउनेछ । बुधबार काठमाडौँ गोर्खाज र लुम्बिनी लायन्सबीच एलिमिनेटर खेल हुनेछ । बिहीबार दोस्रो क्वालिफायर र आगामी शनिबार ग्रान्ड फाइनल खेलिनेछ ।
शनिबार नै हुने दोस्रो खेलमा प्लेअफबाट बाहिरिसकेका पोखरा एभेन्जर्स र चितवन राइनोज प्रतिष्ठाका लागि भिड्दैछन् । विराटनगरको यो जितले एनपीएललाई थप रोमाञ्चक बनाएको छ र अब मंगलबारको पहिलो क्वालिफायर सबैको नजरको केन्द्र बन्नेछ ।
प्रतिक्रिया