जिल्ला प्रशासन कार्यालय मकवानपुरले हेटौँडा बजार क्षेत्रको सडक विस्तार कार्यमा अवरोध पुर्याउने तथा व्यवसायीहरूलाई धम्की दिने व्यक्ति वा समूहलाई कडा कानुनी कारबाही गर्ने चेतावनी दिएको छ ।
बुधबार एक सार्वजनिक सूचना जारी गर्दै प्रमुख जिल्ला अधिकारीले सडक डिभिजन कार्यालयको सडक विस्तार अभियानमा कुनै पनि प्रकारको बाधा नपुर्याउन सबैमा आग्रह गरेका छन् । गत मंसिर ५ गते सडक डिभिजन कार्यालयले नै सूचना जारी गरी सडक विस्तारको तयारी पूरा भएको र मंसिर २० गतेसम्म सम्बन्धित संरचना हटाउन समय दिएको थियो ।
प्रशासनका अनुसार, अधिकांश व्यवसायीहरूले तोकिएको समयसीमाभन्दा अगावै आफ्ना पसल तथा संरचना अन्यत्र सार्ने काम गरिरहेका छन् ।
धेरैले ‘सेल’ तथा विशेष अफर राखेर सामान बिक्री वितरण गरी विकास निर्माणमा सहयोग पुर्याइरहेका छन् । हेटौँडावासी र सरोकारवालाहरूको उत्साहजनक साथ रहेको प्रशासनले जनाएको छ ।
यद्यपि, केही व्यक्तिहरूले व्यवसायीहरूलाई धाक–धम्की दिने, जबरजस्ती पसल बन्द गराउने र सार्वजनिक विकास निर्माणमा अवरोध पुर्याउने कार्य गरिरहेको भन्दै प्रशासनले गम्भीर ध्यानाकर्षण भएको जनाएको छ ।
सूचनामा भनिएको छ, “सडक विस्तार कार्यमा अवरोध खडा गर्ने उद्देश्यले प्रेरित कुनै पनि गतिविधि गर्ने व्यक्तिहरूप्रति प्रशासन पूर्ण सचेत छ । कानुनविपरीत कार्य नगर्न–नगराउन पुनः अनुरोध गरिन्छ । यदि कसैले कानुनको बर्खिलाप गरी अवरोध सिर्जना गरेमा त्यस्ता व्यक्ति वा समूहलाई कडा कारबाही गरिनेछ ।”
प्रतिक्रिया