मन्त्री घिसिङद्वारा विद्युत् भार प्रेषण केन्द्रको अनुगमन, छिनछिनमा बत्ती जाने समस्यालाई तत्काल सम्बोधन गर्न निर्देशन

ऊर्जा, जलस्रोत तथा सिँचाइ, भौतिक पूर्वाधार तथा यातायात व्यवस्था र सहरी विकासमन्त्री कुलमान घिसिङले नेपाल विद्युत् प्राधिकरण मातहतको विद्युत् भार प्रेषण केन्द्रको अनुगमन गरेका छन्। स्यूचाटारस्थित केन्द्रको सोमबार साँझ अनुगमन गर्दै मन्त्री घिसिङले देशभरको विद्युत् उत्पादन, प्रसारण र वितरण प्रणालीको अवस्था, ग्रिड सञ्चालन, विद्युत् माग तथा आपूर्ति व्यवस्थापन, विद्युत् निर्यात र बाढी-पहिरोबाट क्षति भएका विद्युत् आयोजनाहरूको अवस्थाबारे जानकारी लिए।

प्राधिकरणका पूर्वकार्यकारी निर्देशकसमेत रहेका मन्त्री घिसिङले देशका विभिन्न ठाउँबाट छिनछिनमा बत्ती जाने गुनासो आएको भन्दै विद्युत् प्रणालीलाई अझ भरपर्दो, गुणस्तरीय, सुरक्षित र आधुनिक बनाउन अल्पकालीन, मध्यकालीन र दीर्घकालीन नीतिगत तथा प्राविधिक सुधारका विषयमा छलफल गरे। उनले बाढी-पहिरोले क्षति पुर्‍याएका संरचनाको तत्काल मर्मत गरी विद्युत् सेवा सुचारु गर्न र छिनछिनमा बत्ती जाने समस्यालाई तत्काल सम्बोधन गर्न उच्च प्राथमिकता दिन प्राधिकरण व्यवस्थापनलाई निर्देशन दिए।

मन्त्री घिसिङले विद्युतगृह, प्रसारण लाइन र सबस्टेसनलाई पूर्ण क्षमतामा सञ्चालन गर्न, मर्स्याङ्दी करिडोर २२० केभी र हेटौंडा–ढल्केबर ४०० केभी प्रसारण लाइन निर्माणमा विशेष ध्यान दिन र आगामी हिउँदको विद्युत् व्यवस्थापनमा जुट्न आग्रह गरे।

नेपाल विद्युत् प्राधिकरणका कार्यकारी निर्देशक मनोज सिलवालले देशभित्र खपत भई बाँकी रहेको विद्युत् दैनिक औसत १ हजार मेगावाट निर्यात भइरहेको जानकारी दिए। चालू आर्थिक वर्ष २०८२–८३ को साउनदेखि हालसम्म करिब १५ अर्ब रुपैयाँ बराबरको विद्युत् निर्यात भएको छ।

भारतीय ऊर्जा एक्सचेन्ज (आइएक्स) को डेअहेड र रियल टाइम मार्केटमा प्रतिस्पर्धी दरमा तथा द्विपक्षीय मध्यकालीन सम्झौतामार्फत हरियाणा र बिहारमा विद्युत् बिक्री भइरहेको छ। साथै, भारतको प्रसारण संरचना प्रयोग गरी बङ्गलादेशमा दैनिक ४० मेगावाट विद्युत् निर्यात भइरहेको छ। भारतमा भारतीय रुपैयाँ (भारु) र बङ्गलादेशमा अमेरिकी डलरमा विद्युत् बिक्री भइरहेको छ। प्राधिकरणले भारत र बङ्गलादेशमा गरी कुल १ हजार १६५ मेगावाट विद्युत् निर्यातको स्वीकृति प्राप्त गरेको छ।

Advertisement

सम्बन्धित सामाग्री

शेयर धितो कर्जामा २५ करोडको सीमा हट्यो

यस वर्षको तिहारमा कात्तिक ४ गते म्हः पूजा तथा ५ गते किजा पूजा मनाउने नगरपालिकाको निर्णय

असोज १७ पछिको विपद्मा परेर ५३ जनाको मृत्यु

आज सार्वजनिक हुँदै विपिनको ३० सेकेन्डको भिडिओ क्लीप

मतदाता नामावली अद्यावधिक गर्न कार्यकर्तालाई माओवादीको निर्देशन

प्रहरीचौकीमा आक्रमण गरेको आरोपमा वडाध्यक्ष पक्राउ