पाँच पटकको विश्वविजेता ब्राजिल फिफा विश्वकप २०२६ को आफ्नो पहिलो खेलमै मोरक्कोसँग बराबरीमा रोकिएको छ। समूह ‘सी’ अन्तर्गत शनिबार न्यु जर्सीस्थित न्युयोर्क–न्यु जर्सी स्टेडियममा भएको प्रतिस्पर्धात्मक खेलमा ब्राजिलले मोरक्कोसँग १–१ को बराबरी खेल्दै अंक बाँडेको हो।
सन् २०२२ को विश्वकप सेमिफाइनलिस्ट मोरक्कोविरुद्ध ब्राजिललाई हारबाट जोगाउन स्टार फरवार्ड भिनिसियस जुनियरको गोल निर्णायक बन्यो। खेलको २१औँ मिनेटमा ब्राहिम डियाजको उत्कृष्ट पासमा इस्माइल साइबारीले गोल गर्दै मोरक्कोलाई अप्रत्याशित अग्रता दिलाए।
भिनिसियसको जवाफ र बोनोको प्रदर्शन
मोरक्कोको त्यो अग्रता धेरै समय टिकेन र ब्राजिलले खेलमा फर्किन तीव्र दबाब बनायो। खेलको ३२औँ मिनेटमा ब्रुनो गिमाराइसको पासलाई नियन्त्रणमा लिँदै भिनिसियसले व्यक्तिगत कौशलको मद्दतमा उत्कृष्ट गोल गरे।
मोरक्कोका गोलरक्षक यासिन बोनोले ब्राजिलका लुकास पाकेटा र इगोर थियागोका कयौँ प्रहारलाई विफल तुल्याइदिए। दोस्रो हाफमा ब्राजिलले दबाब बढाए पनि राफिन्हा र डानिलोका प्रयासलाई बोनोले सहजै रोके।
अन्तिम समयको रोमाञ्च र आगामी यात्रा
खेलको अन्तिम क्षणमा मोरक्को जितको नजिक पुगे पनि ब्राजिलका गोलरक्षक एलिसन बेकर बाधक बने। निल एल आयनाउईको प्रहार एलिसनले फर्काएपछि रिबाउन्डमा शेम्सदिन ताल्बीले गरेको प्रहारलाई उनले उत्कृष्ट बचाउ गरे।
प्रशिक्षक कार्लो एन्सेलोटीको नेतृत्वमा ब्राजिलले पहिलो पटक विश्वकप खेलिरहेको हो। एन्सेलोटी ब्राजिलको राष्ट्रिय टोलीलाई विश्वकपमा नेतृत्व गर्ने पहिलो विदेशी प्रशिक्षक समेत बने।
चोटका कारण सन् २०२३ देखि मैदान बाहिर रहेका सर्वाधिक गोलकर्ता नेयमार बिना नै ब्राजिल मैदानमा उत्रिएको थियो। यो ऐतिहासिक खेल हेर्न स्टेडियममा सन् २००२ का विश्वकप विजेता खेलाडीहरू रोनाल्डो, रोबर्टो कार्लोस र काका समेत उपस्थित थिए।
पहिलो खेलबाट १–१ अंक जोडेका दुवै टोलीले अब दोस्रो खेलको तयारी गर्नेछन्। ब्राजिलले आफ्नो आगामी खेलमा हाइटीसँग प्रतिस्पर्धा गर्नेछ भने मोरक्कोले स्कटल्यान्डको सामना गर्नेछ।
प्रतिक्रिया