इरानलाई ट्रम्पको कडा चेतावनी: कि वार्तामा आऊ, नत्र ठुलो हमलाका लागि तयार होऊ
ट्रम्पले इरानलाई दुईवटा विकल्प स्पष्ट रूपमा प्रस्तुत गरेका छन्
अमेरिकी राष्ट्रपति डोनाल्ड ट्रम्पले इरानका तीन प्रमुख परमाणु केन्द्रहरू फोर्दो, नताञ्ज र इस्फहानमाथि अमेरिकी हवाई हमला भएको पुष्टि गर्दै राष्ट्रका नाममा सम्बोधन गरेका छन्। ह्वाइट हाउसबाट जम्मा साढे तीन मिनेटको छोटो सम्बोधनमा उनले यी हमलाहरूलाई “शानदार र सफल” भएको दाबी गरे। ट्रम्पले इरानलाई कडा चेतावनी दिँदै शान्तिको लागि वार्ताको टेबलमा आउन वा थप विनाशकारी हमलाको सामना गर्न तयार रहन आग्रह गरे।
“यी स्थानहरूको नाम वर्षौंदेखि सबैले सुनिरहेका थिए, जबदेखि इरानले यी विनाशकारी योजनाहरू तयार गरिरहेको थियो,” ट्रम्पले भने। “आज हामी विश्वलाई बताउन सक्छौं कि यी हमलाहरू सफल भए। अब इरानले शान्ति स्थापना गर्नैपर्छ। यदि उसले त्यसो गरेन भने, भविष्यका हमलाहरू अझ शक्तिशाली र सजिलो हुनेछन्।”
ट्रम्पले इजरायली प्रधानमन्त्री बेन्जामिन नेतन्याहू र इजरायली सेनाको समर्थनप्रति आभार व्यक्त गरे। उनले संकेत गरे कि अमेरिकाले इरानका थप केन्द्रहरूलाई निशाना बनाउन सक्ने सम्भावना कायमै छ। संयुक्त चीफ्स अफ स्टाफका अध्यक्ष ड्यान केन, सीआईएका निर्देशक जोन र्याटक्लिफ र ट्रम्पद्वारा नियुक्त मध्यपूर्व शान्ति दूत स्टीभ विटकोफले यो सैन्य कारबाहीको रणनीति तय गर्नमा प्रमुख भूमिका खेलेका छन्।
इजरायली अधिकारीहरूले भविष्यका सैन्य कारबाहीहरू इरानको प्रतिक्रियामा आधारित हुने बताएका छन्। अमेरिकाले मध्यपूर्वमा ठूलो संख्यामा सैन्य शक्ति र सम्पत्ति परिचालन गरेको छ, जसले ट्रम्पको भनाइलाई बल पुर्याउँछ कि अमेरिका कुनै पनि बेला तीव्र गतिमा अर्को कदम चाल्न तयार छ।
ट्रम्पले इरानलाई दुईवटा विकल्प स्पष्ट रूपमा प्रस्तुत गरेका छन्: “कि त शान्ति हुनेछ, कि त इरानका लागि पछिल्लो समय हामीले देखेको भन्दा धेरै ठूलो त्रासदी हुनेछ।” हमला हुनुअघि सार्वजनिक रूपमा वार्ताको ढोका खुला राखेका ट्रम्पले अहिले पनि वार्ताको सम्भावनालाई जीवित राखेका छन्। तर, इरानी नेतृत्व वार्ताका लागि तयार नदेखिएमा थप अमेरिकी हमलाको खतरा मडारिएको छ।
पेन्टागनमा हुने पत्रकार सम्मेलनमा यो सैन्य अपरेशनको विस्तृत जानकारी दिइने ट्रम्पले बताएका छन्। यद्यपि, उनको सम्बोधनमा हमलाको विशेष विवरण भने खुलाइएको थिएन।
इरानमाथिको यो सैन्य कारबाहीले मध्यपूर्वमा तनाव थप बढाएको छ। अन्तर्राष्ट्रिय समुदायले यो घटनालाई नजिकबाट नियालिरहेको छ। ट्रम्पको यो कदमले इजरायल-इरान द्वन्द्वलाई नयाँ मोडमा पुर्याएको छ भने विश्व शान्तिका लागि नयाँ चुनौती थपिएको छ।
अमेरिकाले इरानलाई शान्तिको बाटो रोज्न आग्रह गरेको छ, तर इरानको अडान र उसको सम्भावित प्रतिक्रियाले आगामी दिनहरूमा क्षेत्रीय स्थायित्वलाई प्रभाव पार्नेछ।
सम्बन्धित सामाग्री
सम्पर्क
बागबजार,काठमाडौंफोन: ०१-५३४५३०४
ईमेल: samayapost@gmail.com
विज्ञापनको लागि: ९८४९०६५१२६, ९८५११२८४७०
सूचना विभाग दर्ता नंं: १९९/७३-७४
प्रतिक्रिया