वैदेशिक व्यापारमा ऐतिहासिक सुधार: निर्यात ७७% ले वृद्धि
चालु आर्थिक वर्ष २०८१/८२ को पहिलो ११ महिनामा नेपालको वैदेशिक व्यापारमा उल्लेखनीय प्रगति देखिएको छ।
भन्सार विभागका अनुसार, २०८१ साउन १ देखि २०८२ जेठ मसान्तसम्मको अवधिमा नेपालले २ खर्ब ४७ अर्ब रुपैयाँ बराबरको वस्तु निर्यात गरेको छ, जुन गत आर्थिक वर्षको सोही अवधिको तुलनामा ७७ प्रतिशतले बढी हो। यो नेपालको इतिहासमै निर्यात वृद्धिको सबैभन्दा उच्च दर हो। यसअघि आर्थिक वर्ष २०४१/४२ मा निर्यात वृद्धिदर ६० प्रतिशत पुगेको थियो।
सोही अवधिमा नेपालले १६ खर्ब ४४ अर्ब रुपैयाँ बराबरको वस्तु आयात गरेको छ, जुन अघिल्लो वर्षको तुलनामा १३ प्रतिशतले बढी हो। यद्यपि, आयातको तुलनामा निर्यातको उच्च वृद्धिदरले नेपालको व्यापार सन्तुलनमा सकारात्मक प्रभाव पारेको छ।
चालु आर्थिक वर्षको ११ महिनामा नेपालको व्यापार घाटा १३ खर्ब ९७ अर्ब २२ करोड ७३ लाख रुपैयाँ रहेको छ, जुन गत वर्षको सोही अवधिको तुलनामा ६.३ प्रतिशतले बढी हो। गत आर्थिक वर्षको ११ महिनामा व्यापार घाटा १३ खर्ब १४ अर्ब ४४ करोड १८ लाख ५८ हजार रुपैयाँ थियो।
चालु आर्थिक वर्षको ११ महिनामा नेपालको कुल वैदेशिक व्यापार १८ खर्ब ९२ अर्ब ३६ करोड ७७ लाख ९९ हजार रुपैयाँ पुगेको छ, जुन गत वर्षको सोही अवधिको १५ खर्ब ९२ अर्ब ९६ करोड ६५ लाख २५ हजार रुपैयाँको तुलनामा १८.८ प्रतिशतले बढी हो।
नेपालको वैदेशिक व्यापारमा देखिएको यो सुधारले देशको अर्थतन्त्रलाई थप बलियो बनाउने अपेक्षा गरिएको छ। विशेषगरी निर्यातमा भएको ऐतिहासिक वृद्धिले नेपालको उत्पादन र बजार विस्तारको सम्भावनालाई उजागर गरेको छ। यद्यपि, व्यापार घाटा अझै पनि चुनौतीका रूपमा रहेकोले सरकारले निर्यात प्रवर्द्धन र आयात व्यवस्थापनमा थप प्रभावकारी नीति अवलम्बन गर्नुपर्ने विज्ञहरूले सुझाएका छन्।
सम्बन्धित सामाग्री
सम्पर्क
बागबजार,काठमाडौंफोन: ०१-५३४५३०४
ईमेल: samayapost@gmail.com
विज्ञापनको लागि: ९८४९०६५१२६, ९८५११२८४७०
सूचना विभाग दर्ता नंं: १९९/७३-७४
प्रतिक्रिया