कञ्चनपुर घटनाको सुरुवात् यसरी भयो , घटनापछि भारतीयले नेपालीको घरको छानो समेत बाँकी राखेनन्
गत महिना नेपाली पक्षले कञ्चनपुरको पुनर्वास नगरपालिकाको आनन्दबजारमा कल्भर्ट बनाउन लागेको थियो। कल्भर्ट बनाउन लाग्दा भारतीय पक्षले त्यो ठाउँ दसगजाभित्र पर्ने भएकाले बनाउन नमिल्ने बतायो । बाटोमा आउजाउ गर्न सजिलो होस् भनेर बनाउँन लागेको कल्भर्टमा विवाद भएपछि दुवैतिरका अधिकारीको बैठक बस्यो । बैठकले प्राविधिक टोली आएर सीमा निर्धारण गर्ने र तत्कालका लागि कच्ची कल्भर्ट निमार्ण गर्ने सहमति गर्यो । सहमतिअनुसार पुनर्वास नगरपालिकाले हिम पाइप राखेर कल्भर्ट निर्माण गर्यो। कल्भर्टको माथिल्लो भागमा सिमेन्ट राखेर इँटा पनि बिछ्याइएको थियो । यही विषयलाई निहुँ बनाएर एसएसबीका जवान बुधबार राति नेपाल पसेका थिए । हतियारसहित आएका उनीहरूले इन्दिरा गुरुङको घरमा पसेर घर छाड्न धम्काएको र श्याम गुरुङलाई कुटपिट गरेको स्थानीय बताउँछन् ।
यसरी महिना दिन अगाडी भएको सहमती तोड्दै भारतीय सीमा सुरक्षा बल नेपाल प्रबेश गर्यो । कल्भर्ट निर्माण गर्न लागेको स्थानलार्इ गुगल म्यापले भारतको भूमि देखाएको भन्दै एसएसबीले काम रोक्न धम्की दिएपछि विवाद सुरु भयो । गैरकानुनी रूपमा एसएसबी कञ्चनपुर प्रबेश गरेर विवाद झिकेपछि बिहिबार दुवै पक्षविच झडपको स्थिती सिर्जना भयो । प्रतिरोधमा उत्रिएका नेपालीमाथि भारतीय सीमा सुरक्षा बलले गोली चलायो । भारतीय प्रहरीले चलाएको गोली ३० वर्षीय गोविन्द गौतमको कम्मरमा लाग्यो । कम्मरमा गोली लागेर गम्भीर घाइते भएका उनलाई धनगढीस्थित सिपी अस्पतालमा पुर्याइएको थियो । तर उनलार्इ अस्पताले बचाउँन सकेन । उनको मृत्यु भयो ।
एसएसबीले गोली चलाएपछि एसएसबीसँगै छिरेका भारतीयहरुले आनन्द बजारका स्थानीयको घरमा पसि बाख्रा, खसीबोका, भाडाकुँडा र लत्ताकपडा समेत लुटेर लगेको प्रत्यक्षदर्शी बताउँछन् । स्थानीय श्याम गुरुङको घरबाट भारतीयहरुले घरको छानामा रहेको टीनका पातासमेत उक्काएर लगेको प्रत्यक्षदर्शी बताउँछन् । गुरुङको घरमा रहेको एउटा मोटरसाइकलसमेत भारतीयले लुटेर लगेको स्थानीयले बताए । एसएसबीको आडमा भारतीयहरुले नेपालीको घरमा तोडफोड गर्दा नेपाल प्रहरी भने मूकदर्शक बनिरहेको स्थानीयले गुनासो गरेका छन् ।
प्रतिक्रिया