बीमा नियमावलीलाई अन्तिम रूप दिन प्राधिकरणले सिइओहरुसँग माग्यो सुझाव

नेपाल बीमा प्राधिकरणले बीमा नियमावली, २०७९ को मस्यौदालाई अन्तिम रूप दिन बीमा कम्पनी तथा पुनर्बीमा कम्पनीका प्रमुख कार्यकारी अधिकृतहरूसँग सुझाव माग गरेको छ ।

प्राधिकरणले एक कार्यक्रमको आयोजना गरि बीमा नियमावलीले समेट्नुपर्ने विषयहरू सात दिनभित्र लिखित रूपमा पेस गर्न बीमा कम्पनी तथा पुनर्बीमा कम्पनीहरूलाई आग्रह गरेको हो ।

कार्यक्रममा प्राधिकरणका अध्यक्ष सूर्यप्रसाद सिलवालले बीमा नियमावली, २०७९ को अन्तिम चरणमा रहेकोले अध्यक्ष सिलवालले बीमा कम्पनी तथा पुनर्बीमा कम्पनीका प्रमुख कार्यकारी अधिकृत (सिइओ)हरूलाई संस्थागत रूपमा लिखित सुझाव दिन आग्रह गरे ।

अध्यक्ष सिलवालले बीमा कम्पनी, पुनर्बीमा कम्पनी, बीमा सर्भेयर, बीमा अभिकर्ता लगायत सरोकारवालाहरूबाट प्राप्त सुझावहरू समेतका आधारमा बीमा नियमावली, २०७९ को मस्यौदालाई अन्तिम रूप दिई स्वीकृतिका लागि सरकारलाई बुझाइने जानकारी दिए ।

‘बीमक, बीमा मध्यस्थकर्ता र बीमितका सम्बन्धमा नियमावलीमा के कस्ता व्यवस्था हुन आवश्यक छ, त्यस सम्बन्धी सुझावको अपेक्षा गरिएको छ । बीमा नियमावली फराकिलो हुनुपर्छ, यसमा सबै विषयलाई समेट्नुपर्छ’ अध्यक्ष सिलवालले भने, ‘नेपाली बीमा कम्पनीहरूको पुँजी बढ्दै गएको छ, त्यसलाई पनि हेर्नुपर्छ । नेपाली बीमा कम्पनीलाई विदेशमा शाखा खोल्न दिने विषयलाई नियमावलीमा समेटिनुपर्छ, यसमा कन्जुस्याइँ गर्नुहुँदैन, बाटो खोल्दै जानुपर्छ । धेरै नेपाली कार्यरत रहेका देशमा नेपाली बीमा कम्पनीले शाखा खोल्न सक्छन् । विदेशी बीमा सर्भेयरलाई पनि नियमावलीमा समेट्नुपर्छ ।’

सोही अवसरमा अध्यक्ष सिलवालले वर्षौँदेखि कार्यरत पुराना बीमा सर्भेयर र नयाँ सर्भेयर छनौटका सम्बन्धमा नियमावलीमा स्पष्ट व्यवस्था गर्नुपर्ने बताए । बीमा अभिकर्तालाई बीमा कम्पनीले काम दिने भएकाले त्यसको जस अपजस पनि कम्पनीले लिनुपर्ने उनको भनाइ छ ।

बीमा व्यवसायको विकास एवम् विस्तारका लागि बीमा ऐन, नियम र निर्देशिका पूर्ण रूपमा पालना गरी अगाडि बढ्न बीमा कम्पनीहरूलाई उनले निर्देशन समेत दिए ।

सम्बन्धित सामाग्री