कोभिड १९ : सबै पालिकामा विपद् व्यवस्थापन कोष
कोभिड १९ (कोरोना भाइरस) को सम्भावित जोखिमलाई ध्यान दिँदै विपद् व्यवस्थापन कोषमा झापाका स्थानीय तहले छुट्टा छुट्टै रकम जम्मा गरी सो भाइरसका विरुद्धमा जनचेतनालाई तिव्र पारेका छन् ।
जिल्लास्थित विपद् व्यवस्थापन समितिले कोषमा ५० लाख रुपैयाँ जम्मा गरेको छ । १५ वटा स्थानीय तहले आ – आफ्नै पालिकास्तरका सो कोष स्थापना गरेका छन् । निगरानी कक्ष (क्वारेन्टाइन) निर्माणदेखि क्वारेन्टाइनमा राखिएका व्यक्तिलाई आवश्यक खाद्यन्य, स्वास्थ्य र सरसफाइका लागि छुट्टा– छुट्टै कोषको व्यवस्थापन गरिएको बताइएको छ । झापामा विपद् व्यवस्थापनका लागि मेचीनगरपालिकाले सबैभन्दा बढी रकम छुट्याएको छ । प्रदेश सरकारले १० लाख रुपैयाँ प्रदान गरेसँगै सो नगरपालिकाले ६० लाख रुपैयाँको सो कोष स्थापना गरेको नगरपालिका प्रमुख विमल आचार्यले जानकारी दिनुभयो । उहाँले नगरपालिकाले ७० शैथ्याको क्वारेन्टाइन निर्माण गरेको जानकारी दिनुभयो । सो क्वारेन्टाइनमा अहिले भारत लगायत विभिन्न देशबाट आएका २१ जना रहेका छन् ।
कनकाई नगरपालिकाले पनि ५० लाख रुपैयाँको कोष स्थापना गरेको छ । विर्तामोड नगरपालिकाले छुट्टै कोष स्थापना नगरेपनि नगरपालिका भित्र रहेको सो कोषमा रहेको रकमबाट विपद्का समयमा आवश्यक रकम खर्च गर्ने व्यवस्था मिलाएको नगरप्रमुख ध्रुवकुमार शिवाकोटीले जानकारी दिनुभयो । कमल गाउँपालिका र दमक नगरपालिकले पनि विपद्का लागि भन्दै १०-१० लाख रुपैयाँको कोष स्थापना गरेका छन् ।
झापामा छुट्टा छुट्टै गाउँपालिका र नगरपालिकले आफ्ना पालिका भित्र रहेका नागरिकलाई सुरक्षित रुपमा घरमै बस्न आग्रह छन् । दुई वटा अस्पताल मेची र विएण्डसीमा आइसोलेलनसहितको व्यवस्था मिलाइएको छ । ३३१ वेडका क्वारेन्टाइन निर्माण गरिएको छ ।
प्रतिक्रिया