चालु आर्थिक वर्ष २०८२/८३ को दोस्रो त्रैमाससम्म नेपालका सूचीकृत विकास बैंकहरूले उल्लेखनीय वित्तीय सुधार देखाएका छन्। कुल १५ वटा विकास बैंकहरूले पुस मसान्तसम्म ३ अर्ब ४४ करोड रुपैयाँभन्दा बढी खुद मुनाफा आर्जन गरेका छन्। यो रकम गत आर्थिक वर्षको सोही अवधिको तुलनामा करिब ३२ देखि ३५ प्रतिशतले बढी हो। गत वर्ष यो अवधिमा विकास बैंक समूहले २ अर्ब ५५ करोड रुपैयाँ मात्र खुद मुनाफा गरेको थियो।
यो नाफा वृद्धि मुख्य रूपमा इम्पेयरमेन्ट चार्ज उल्ट्याउने तथा प्रोभिजनिङ खर्च घटाउने कारणले भएको विश्लेषण छ। विगतमा विकास बैंक क्षेत्रको वित्तीय अवस्था खराब भन्ने धारणा रहे पनि हालका तथ्यांकले क्रमिक सुधारको संकेत दिएको छ।
शीर्ष नाफा कमाउने बैंकमा मुक्तिनाथ विकास बैंक रहेको छ जसले ६७ करोड २० लाख रुपैयाँ खुद मुनाफा गरेको छ। यसको प्रति शेयर आम्दानी १६.२० देखि १६.८० रुपैयाँसम्म रहेको छ। गरिमा विकास बैंकले ६३ करोड ५१ लाख रुपैयाँ नाफा कमाएर दोस्रो स्थानमा छ। शाइन डेभलपमेन्ट बैंकले ४० करोड ४२ लाख, कामना सेवा विकास बैंकले ३० करोड ४५ लाख, ज्योति विकास बैंकले ३० करोड ५९ लाख, सांग्रिला डेभलपमेन्ट बैंकले ३० करोड २५ लाख र लुम्बिनी विकास बैंकले २८ करोड ५३ लाख रुपैयाँ खुद मुनाफा आर्जन गरेका छन्।
प्रति शेयर आम्दानीको आधारमा गरिमा विकास बैंक र कामना सेवा विकास बैंक २० रुपैयाँभन्दा माथि पुगेका छन् भने कुल १५ बैंकमध्ये ९ वटाको प्रति शेयर आम्दानी १४ रुपैयाँभन्दा बढी छ। मुक्तिनाथ, सांग्रिला र शाइनको पनि प्रदर्शन सन्तोषजनक रहेको छ।
दुई बैंक भने घाटामा छन्। नारायणी विकास बैंकले ४ करोड ७३ लाख र सिन्धु विकास बैंकले १ करोड ५४ लाख रुपैयाँ नोक्सानी बेहोरेका छन्। गत वर्ष तीन बैंक घाटामा गएका थिए तर एक्सेल र सप्तकोशी विकास बैंकले यस वर्ष घाटाबाट नाफामा फर्किएका छन्। एक्सेल, मितेरी, सप्तकोशी, कर्पोरेट र ग्रिन डेभलपमेन्ट बैंकको नाफा १० करोडभन्दा कम रहेको छ।
प्रतिक्रिया