मेटलाइफको नाफा साढे ४९ करोड माथि, यस्ता छन् अन्य वित्तीय सूचक
अमेरिकन लाइफ इन्स्योरेन्स कम्पनी (मेटलाइफ) ले आर्थिक वर्ष २०८१/८२ को चौथो त्रैमासिकको अपरिष्कृत वित्तीय विवरण सार्वजनिक गरेको छ। कम्पनीले समीक्षा अवधिमा उल्लेखनीय वित्तीय प्रगति हासिल गरेको छ, यद्यपि नाफामा केही कमी देखिएको छ।
वित्तीय विवरणअनुसार, मेटलाइफले आर्थिक वर्ष २०८१/८२ मा ४९ करोड ६१ लाख रुपैयाँ खुद नाफा आर्जन गरेको छ। अघिल्लो आर्थिक वर्ष २०८०/८१ मा कम्पनीको खुद नाफा ८२ करोड ७९ लाख रुपैयाँ रहेको थियो। यो वर्षको नाफा अघिल्लो वर्षको तुलनामा ४०.०७ प्रतिशतले घटेको छ। यद्यपि, कम्पनीले बीमांकीय मूल्यांकनअनुसारको दायित्व समायोजनअघिको नाफा भएकोले यो तुलना पूर्णरूपमा तुलनायोग्य नहुन सक्छ।
समीक्षा वर्षमा कम्पनीको जीवन बीमा कोष २९ अर्ब ५८ करोड १५ लाख रुपैयाँ पुगेको छ, जुन अघिल्लो वर्षको २५ अर्ब ६० करोड ६२ लाखको तुलनामा १५.५४ प्रतिशतले बढी हो। कम्पनीले ६ अर्ब २५ करोड ८३ लाख रुपैयाँ कुल बीमाशुल्क आर्जन गरेको छ, जुन अघिल्लो वर्षको ५ अर्ब ६७ करोड ८८ लाखको तुलनामा १०.२० प्रतिशतले बढेको छ। त्यस्तै, समीक्षा अवधिमा ६ अर्ब १ करोड २ लाख रुपैयाँ खुद बीमाशुल्क आर्जन भएको छ, जुन अघिल्लो वर्षको ५ अर्ब ४५ करोड ६४ लाखको तुलनामा १०.१५ प्रतिशतले बढेको छ।
प्रथम वर्षको बीमाशुल्क १८.७५ प्रतिशत र नवीकरण बीमाशुल्क ९.९५ प्रतिशतले बढेको छ। कम्पनीको लगानी १०५ प्रतिशतले र वासलात १३५ प्रतिशतले वृद्धि भएको छ। मेटलाइफले यस वर्ष २.९५ अर्ब रुपैयाँ दाबी भुक्तानी गरेको छ। महाविपत्ति कोषमा ५७ करोड ६८ लाख, रिटेन्ड अर्निङमा २ अर्ब ६२ करोड २२ लाख र अन्य इक्विटीमा १ अर्ब १७ करोड ४१ लाख रुपैयाँ रहेको छ।
मेटलाइफ, अमेरिकन लाइफ इन्स्योरेन्सको सहायक कम्पनीको रूपमा सन् २००१ देखि नेपालमा सञ्चालनमा छ। कम्पनीले नेपालमा जीवन बीमा, दुर्घटना तथा स्वास्थ्य बीमा र कर्मचारी लाभ (समूह बीमा) जस्ता सेवाहरू प्रदान गर्दै आएको छ। मेटलाइफले उपभोक्ता र व्यवसायहरूलाई गुणस्तरीय बीमा सेवाहरू उपलब्ध गराउँदै नेपालको बीमा क्षेत्रमा महत्त्वपूर्ण योगदान पुर्याएको छ।
सम्बन्धित सामाग्री
सम्पर्क
बागबजार,काठमाडौंफोन: ०१-५३४५३०४
ईमेल: samayapost@gmail.com
विज्ञापनको लागि: ९८४९०६५१२६, ९८५११२८४७०
सूचना विभाग दर्ता नंं: १९९/७३-७४
प्रतिक्रिया