नेकपा (एमाले) का अध्यक्ष केपी शर्मा ओलीले दलहरुको सहमतिमा नै संविधान लेखिएकाले संविधानमा लेखिएको चुनावी प्रणाली मान्दिन भन्न नमिल्ने बताएका छन् ।

सन्त नेता कृष्णप्रसाद भट्टराईको ९४औँ जन्मोत्सवका अवसरमा आयोजित कार्यक्रममा उनले नेपाली काँग्रेसतर्फ लक्षित गर्दै खेल सकिएर एउटाले जितेर विजयको हात हल्लाएपछि अर्काेले खेलको नियम मान्दिन भन्न नहुने बताए ।

Advertisement

उनले भने, “हामी आफैँले बनाएको प्रणालीलाई सर्वस्वीकार्य बनाउनुपर्छ ।”

आफू शासक नभएको र आफूमा कुनै पनि खालको दम्भ नभएको अध्यक्ष ओलीले दाबी गरे । एउटा सामान्य किसान परिवारमा जन्मे हुर्केको उनले बताए । उनले भने, “म कुलघरानाको होइन, घाँस काटेर, भकारो सोहोरेर हुर्किएको हो, ममा कुनै दम्भ छैन ।”

अध्यक्ष ओलीले कृष्णप्रसाद भट्टराईले एउटा युग र परिवर्तनको नेतृत्व गरेको स्मरण गरे । राणाकालको कष्टकर समयमा समेत परिवर्तनका लागि लागेको भन्दै उनले भट्टराईको प्रशंसा गरे ।

उनले भने, “अप्ठेरो समयमा पनि भट्टराईले समयको साक्षी मात्रै होइन त्यो समयलाई अघि बढाउन भूमिका पनि खेल्नुभयो ।” नागरिकले आफ्नो देशप्रति गर्व गर्दा मात्रै देश अघि बढ्नसक्ने उनको जिकिर थियो ।

नेपाली काँग्रेसका पूर्व महामन्त्री प्रकाशमान सिंहले नेपाली काँग्रेससँग जनताको आकांक्षा धेरै भएको औँल्याए ।

नेपाली काँग्रेसका केन्द्रीय सदस्य प्रदीप गिरीले एमाले अध्यक्ष ओलीले पार्टीभित्र र प्रतिपक्ष दुवैलाई मिलाएर लानुपर्नेमा जोड दिए ।

प्रा डा जगमान गुरुङले सन्त नेता कृष्णप्रसाद भट्टराईबाट अहिलेका नेताहरुले धेरै कुरा सिक्नसक्ने बताए ।

प्रतिष्ठानका सदस्य आनन्द स्वामीले स्पष्टता र राष्ट्रियताका सवालमा सन्त नेता भट्टराई र अध्यक्ष ओलीबीचमा समानता भएको बताए ।
रासस