संविधान संशोधन नभएसम्म चुनाव गर्न दिदैनौ : महन्थ ठाकुर
तराई मधेस लोकतान्त्रिक पार्टी अध्यक्ष महन्थ ठाकुरले संविधान संशोधन नभएसम्म चुनाव हुन नदिने बताएका छन ।
अवधी पत्रकार संघले नेपालगञ्जमा आयोजना गरेको पत्रकार सम्मेलनमा मधेसी मोर्चाका नेता ठाकुरले संविधान संशोधन नभएसम्म कुनै हालतमा चुनाव गर्न नदिने बताएका हुन् ।
पत्रकार सम्मेलनमा नेता ठाकुरले भने, ‘मधेसी मार्चाको सहमति विनाको संविधान संशोधन र त्यसपछि हुने निर्वाचनमा हामी भाग पनि लिँदैनौं र निर्वाचन हुन पनि दिँदैनौं ।’
नेता ठाकुरले मधेसी मोर्चाको माग नै सम्बोधन नहुने संशोधन प्रस्ताव ल्याएमा विद्रोह गर्ने चेतावनी समेत दिए । उनले भने, ‘हामीले सरकारलाई आफ्नो मागका बारेमा प्रष्ट रुपमा भनिसकेका छौं, तर सरकारले एक हातमा बन्दुक र अर्को हातमा संशोधनको प्रस्ताव लिएर आयो भने कुनै पनि हालतमा मानिने छैन, डटेर सामना गर्छौं ।’
यस्तै नेता ठाकुरले एमाले जहिले पनि मधेसी र मधेसप्रति रुखो टिप्पणी गर्ने गरेको आरोप पनि लगाए । ठाकुरले संविधान संशोधनमा एमालेले अवरोध पुर्याउन सक्ने तर रोक्न नसक्ने दावी गरे ।
प्रतिक्रिया