इंग्ल्यान्डका मिडफिल्डर जुड बेलिङ्घमले आफ्नो स्थानलाई लिएर बाहिर भइरहेका विभिन्न टीकाटिप्पणीले विश्वकपमा उत्कृष्ट लय समात्न मद्दत पुग्ने बताएका छन् । विश्वकपको पहिलो खेलअघि मुख्य प्रशिक्षक थोमस टुचेलले रियल म्याड्रिडका बेलिङ्घम वा एस्टन भिल्लाका मोर्गन रोजर्समध्ये कसलाई कप्तान ह्यारी केनको पछाडि नम्बर १० को भूमिकामा मैदान उतार्छन् भन्नेमा ठूलो चासो थियो ।
डालसमा भएको क्रोएसियाविरुद्धको खेलमा बेलिङ्घमले सुरुवाती-११ मा मौका पाए र खेलको दोस्रो हाफको सुरुमै टोलीका लागि महत्त्वपूर्ण तेस्रो गोल गरे । मार्कस रासफोर्डले ढिलो गरी चौथो गोल थपेपछि इंग्ल्यान्डले क्रोएसियामाथि ४-२ को रोमान्चक जित निकालेको थियो ।
आफ्नो चौथो ठूलो अन्तर्राष्ट्रिय प्रतियोगिता खेलिरहेका २२ वर्षीय बेलिङ्घमले बाहिरका कुराहरूलाई बिर्सेर टोलीलाई जिताउन आफू कति प्रतिबद्ध छु भन्ने प्रमाणित गर्न पाउँदा खुसी लागेको बताएका छन् । राष्ट्रका लागि योगदान पुर्याउनु आफ्नो लागि सधैँ ठूलो सम्मानको विषय रहने उनको भनाइ छ ।
चोटका कारण सन् २०२५-२६ को सिजनको सुरुवात सुखद नरहेको र उनको क्लब रियल म्याड्रिड पनि बार्सिलोनाभन्दा ८ अंकले पछि परेका कारण बेलिङ्घमले राष्ट्रिय टोलीमा आफ्नो स्थानका लागि दबाब झेल्नुपरेको थियो । यद्यपि आफू अहिले पूर्ण रूपमा फिट र तीक्ष्ण महसुस गरिरहेको उनले बताएका छन् ।
पूर्वखेलाडी जोर्डन हेन्डरसनले बेलिङ्घम इंग्ल्यान्डका लागि ‘एक्स-फ्याक्टर’ भएको बताएका थिए भने पूर्वडिफेन्डर मिका रिचर्ड्सले उनलाई ठूला खेलका खेलाडीका रूपमा प्रशंसा गरेका छन् । क्रोएसियाविरुद्ध इलियट एन्डरसनको पासलाई सदुपयोग गर्दै बेलिङ्घमले उत्कृष्ट गोल गरेका थिए ।
यसअघि सन् २०२२ को विश्वकपको पहिलो खेलमा इरानविरुद्ध गोल गरेका बेलिङ्घमले यो विश्वकपको पहिलो खेलमा पनि सोही प्रदर्शन दोहोऱ्याएका हुन् । बाहिर हुने आलोचनाले आफूलाई खेलमा केन्द्रित हुन र थप ऊर्जाका साथ मैदान उत्रन मद्दत पुग्ने उनले स्वीकार गरेका छन् ।बीबीसी
प्रतिक्रिया