एन आई सी एशिया बैंकले आफ्नो संस्थागत सामाजिक उत्तरदायित्व (सीएसआर) कार्यक्रम अन्तर्गत बर्दगोरिया गाउँपालिका–२, कैलालीमा रहेको ‘असहायका लागि सहयोगी हातहरु नेपाल (सहारा घर)’ लाई डाइनिङ टेबल, बेन्च र स्वच्छ खानेपानीका लागि वाटर डिस्पेन्सर प्रदान गरेको छ ।
यो सहयोगले सहारा घरमा आश्रित बालबालिका, महिला, शारीरिक रूपमा विशेष क्षमता भएका व्यक्ति तथा पाका उमेरका ९७ जना व्यक्तिहरूको बसाइलाई थप सहज र स्वस्थ बनाउने अपेक्षा बैंकले गरेको छ ।
मिति २०८२ चैत्र २६ गते एक कार्यक्रमबीच बैंकका सर्कल हेड–धनगढी दिपक विष्टले सहारा घरका अध्यक्ष बलबहादुर विष्टलाई उक्त सामग्री हस्तान्तरण गर्नुभयो ।
सहारा घरले असहाय, परनिर्भर, बालबालिका तथा सहयोग आवश्यक पर्ने व्यक्तिहरूलाई खाना र बस्ने सुविधासहित आश्रय दिँदै आएको छ । बैंकले उपलब्ध गराएको यो सहयोगले उनीहरूको दैनिक जीवनमा सकारात्मक प्रभाव पार्ने र स्वच्छ खानेपानीको पहुँच सुनिश्चित गर्ने विश्वास व्यक्त गरेको छ ।
यसअघि पनि एन आई सी एशिया बैंकले शान्ति सेवा गृह (तिलगंगा, काठमाडौं) मा रहेका विद्यार्थीहरूलाई शैक्षिक सामग्री हस्तान्तरण गरेको थियो । यसै वर्ष सातै प्रदेशका विभिन्न सरकारी तथा सामुदायिक विद्यालयमा कक्षा ६ देखि १० सम्म अध्ययनरत गरिब, जेहेन्दार, विपन्न, पिछडिएका वर्ग तथा विशेष क्षमता भएका विद्यार्थीहरूलाई छात्रवृत्ति प्रदान गरेको छ । विगतका वर्षहरूमा पनि बैंकले जेहेन्दार विद्यार्थीहरूलाई छात्रवृत्ति तथा सातै प्रदेशका सरकारी तथा सामुदायिक विद्यालयमा पुस्तकालय भवन निर्माण र पुस्तकालय स्थापना गरिसकेको छ ।
एन आई सी एशिया बैंकले शिक्षा, स्वास्थ्य र सामाजिक कल्याणका क्षेत्रमा निरन्तर सहयोग गर्दै आएको छ ।
प्रतिक्रिया