भारतीय राष्ट्रपति मुखर्जीको शन्देश ‘छिमेकको शान्ति र स्थायित्वलाई भारतले सधैं जोड दिइरहन्छ’
भारतका राष्ट्रपति प्रणव मुखर्जीले छिमेकीको शान्ति र स्थायित्वमा नै भारतको जोड रहेको बताएका छन्। भारतको ६८ औं गणतन्त्र दिवसको अवसरमा उनले प्रस्तुत गरेको सन्देशमा उक्त धारणा व्यक्त भएको हो । भारतको गणतन्त्र दिवसको अवसरमा काठमाडौंस्थित भारतीय दूतावासमा आयोजित कार्यक्रममा राजदूत रणजित रायले राष्ट्रपतिको सन्देश पढेर सुनाएका थिए ।
राष्ट्रपति मुखर्जीको नेपाल भ्रमणले नेपाल भारत सम्बन्ध थप उचाईमा पुगेको उनको धारणा थियो। ‘छिमेकको शान्ति र स्थायित्वलाई भारतले सधैं जोड दिइरहन्छ ’ उनको सन्देशको मुख्य अंश थियो । राजदूत रायले उक्त धारणासहित छिमेक पहिला नीति र साथसाथ विकासलाई भारतले बढवा दिएको भन्दै यसमा आफूहरु दृढ रहेको बताए।
कार्यक्रममा राजदूतावासको रक्षा विभागद्वारा नेपालमा बस्ने भारतीय भूपूहरुको लागि भारत सरकारले प्रदान गर्ने कल्याण कार्यक्रमहरु समेटेर प्रकाशित ‘भूपू २०१६ नामक पुस्तकको पनि विमोचन भएको थियो । राजदूतले भारतीय सेनाका १४ भूपू सैनिक, तिनका विधवा, आश्रित तथा शारीरिक रुपले अशक्त भूपू सैनिकहरुलाई रक्षा सहचारी कल्याण कोषबाट ३ करोड ७५ लाख को चेक तथा कम्बल समेत वितरण गरे ।
नेपालका दुर्गमसहित विभिन्न स्थानमा रहेका पुस्तकालय, प्राथमिक विद्यालय, उच्च माध्यमिक विद्यालय तथा महाविद्यालयहरु गरी ६० शैक्षिक संस्था तथा तालिम प्रतिष्ठानहरुलाई पुस्तकहरु समेत दिइएको थियो ।
भारत सरकारद्वारा नेपालका विभिन्न जिल्लाका अस्पतालहरु, नाफा नकमाउने परोपकारी संस्थाहरु तथा शैक्षिक संस्थाहरुलाई नेपालमा स्वास्थ्य तथा शैक्षिक सेवा अभिवृद्धि गर्न २० वटा एम्बुलेन्स र ४ वटा बस उपहार दिइएको छ । राजदूतले नेपालमा शैक्षिक र स्वास्थ्य सेवा सवल गराउन ती संस्थालाई साँचो हस्तन्तरण गरेका हुन् । नेपालको एक भूपू संगठनलाई दुई एम्बुलेन्स पनि उपहार दिइएको थियो ।
भारतले सन् १९९४ देखि नेपालको ७३ जिल्लाहरुमा अवस्थितविभिन्न संस्थाहरुलाई ६ सय २ एम्बुलेन्सहरु प्रदान गरिसकेको छ । भारतले नेपालका २८ जिल्लामा रहेका विभिन्न शैक्षिक तथा कल्याणकारी संस्थाहरुका हजारौं विद्यार्थीहरुको विद्यालयमा सहज पहुँचको लागि १ सय १८ बस उपहार स्वरुप उपलब्ध गराइसकेको छ ।
प्रतिक्रिया